Sunday, December 24, 2006
[ رحلة عُمر ]
تلميذة يا سيدي في مدرسة عشقك أتعلم الأبجدية ، فاعطف على من يتعثر بين التاء والثاء


تنهمر أسئلتك ،
أقف عاجزة أمامها لا أملك الجواب
أفكّر ألف مره قبل أن أتفوّه بإجابة ترضي غرورك وترضيك

تتفنن في اختباراتك ..
تختارها بعناية حتى تضمن نجاحي بإمتياز
أحاول قدر استطاعتي تجنب السقوط

ولكني أسقط

أسقط بسهولة في مدرسة عشقك
تحتويني بين نبضاتك
وتغرقني في بحرك
وأنت تعلم بأنني لا أُجيد العوم
!

تتركني وحيدة .. تلاطمني الأمواج
أُصارع وحدي
ينهكني التعب

بعد وقت قصير
أغرق
!

وعندما تتأكد من حادثة غرقي
فيك

تنتشلني منك

وترميني لسواحلك

أقاسي ألم غرقي
واشتياقي


..



أهواك
.. ؟

هل أملك حق التساؤل
أم تم سلب هذا الحق مني



أنساك
.. ؟

هل بإمكاني نسيانك وأنت معلمي الأول
أستاذ غرامي الأوحد


...



خلال الشرح تعلمت ، بأن

الضمائر كلها اجتمعت فيك
حروف الوصل مرتبطة بك


وبأن الاعراب هو فنك

فالفعل ، لك الخيار في اعرابه
قد تجره معك إلى الخيال
أو تنصبه كتجربة لا تتكرر
أو ترفعه إلى أي درجة تريد

والمفعول به ينصب حسبما تشاء

أما الفاعل فيرفع من خلالك إلى ما هو أبعد من حدود الطبيعة البشرية

المبتدأ ممتد منك وإليك
أما الخبر فقد أُذيع بجميع نشراتك اليومية

الصفة هي
حالة حب مجنونة لا دواء متوافر للشفاء منها في الوقت الحاضر

وما بين التنوين والفتح والكسر والضم والسكون
تجدني تارةً تائهة ومستمتعة
وأحياناً أخرى حائرة تعيسة

تفتح قلبك
ليضمني إليك
ثم تكسرني إلى أرباع متناثرة
حيث يتملكني السكون تجاهك


...

...

تلميذة أنا لا أكثر
في مدرسة عشقك أتعلم الأبجدية

فمتى تعطف يا سيدي
وتتكرّم عليّ
..

بحفلة تخرجي السنوية






كتب في
18-12-2006




_______________________________________________






عندما يداهمني التعب ، تعب روحي قبل جسدي
أتمنى السفر
..
وألحّ في طلبي هذا

أتمنى ترك جميع ما يُتعبني خلفي
وأرحل

بالمقابل
يكون هناك تناقض داخلي ، صادر مني
عدم تقبل لفكرة الرحيل عن هذه الأرض

على الرغم من أن السفر محدد بموعد للعودة
أي ليس بحالة مستمرة و بصفة دائمة
إلا انني لا أحبذ فكرة الابتعاد
والرحيل عن بحر و هواء
"ديرتي"

تناقض غريب يجتمع فيني
ولكن
هذه هي الحقيقة

أرغب بالسفر طلباً للراحة والتجديد
وأرفض الابتعاد والحريل

الحنين لـ "الديره" يلتهم روحي
فلا أقوى على المغادرة

وإن رحلت .. أحرص على أن لا تطول رحلة غيابي


****


كنت أستعد هذه الرحلة منذ ما يُقارب السنة

أعلم بأنها رحلة عمر
بكل ما تحمله هذه الكلمة من معنى

ولهذا كانت تجهيزاتي لها مختلفة عن رحلاتي السابقة

..


أن تبدأ 2007 وأنا
هناك

ذلك يفيد بأنها ستكون سنة جديدة مليئة بالخير والإطمئنان بإذن الله


..

أودّ الاسهاب في التعبير ولكن
تهرب الكلمات مني
فلا أملك وصف غير


انني ذاهبة في رحلة
حج

لكي أرجع كـ"حجيه"حقيقية

:)

وكلي أمل بأن يتقبل ربنا منا صالح الأعمال
ويعيننا على طاعته

أتمنى أن أرجع
وقد تركت هذه الرحلة أثرها على روحي ونفسي وايماني


أستودعكم الله الذي لا تضيع ودائعه
وأسألكم أن تحللونني
..

سأفتقدكم

..


كل عام وأنتم بألف خير
عام مليء بالسلام و السعادة و الحب - على الجميع


و


عيدكم مبارك - مقدماً جداً




this lovely pic BY Nescafe' @ Laqta.com
 
posted by 78o8eYa at 2:17 PM | Permalink | 25 comments
Sunday, December 17, 2006
ذكريات وخواطر تحت المطر

تلميذة يا سيدي في مدرسة عشقك أتعلم الأبجدية ، فاعطف على من يتعثر بين التاء والثاء
..

،،يتبع
------**------**------



تنتشي روحي هائمة تحت زخات المطر
ابتسم دونما هدف
ابتسم لمجرد الابتسام
وهل يجب أن أبدي أسبابي المقنعة لابتسامة مرسومة على شفتي .. ؟


أرقب انهماره بعنف
كـ طارق مصرّ على فتح باب مغلق
وأحياناً تتساقط زخاته برقة
كـ أم تهدهد إبنها الرضيع


تبتل المساحات الخاوية في قلوبنا قبل أرضنا العطشى
تبتل ولا ترتوي .. تطلب باستجداء: هل من مزيد ؟


تسري رعشة برد تقشعر لها الأرواح قبل الأطراف
تذكرنا بحاجتنا الملحة لقلوب مشتعلة بالحب
لأرواح دافئة تمدنا بالمطلوب في حياتنا الباردة


أبحث بين الوجوه المنشغلة بعطاء السماء
أتفحص بلهفة طفل أضاع لعبته الثمينة
أترقب وأنتظر
لحظة إلتقاء
عيني
..
..
بك
!




"خواطر عاشقة تحت المطر"

____________________________





أتذكر في طفولتي زيارتنا لعمة أبي ، أكبر العمات والوحيدة الباقية على قيد الحياة ، أطال الله في عمرها وأتمّ عليها بالصحة والعافية

كنت ..ولازلت أحبها ، بطبيعتي أستمتع بالجلوس مع كبار السن
وكانت أحاديثها تأسرني


البيت العود
بـ "جبله" أو قبلة


حياة البساطة
الروح المميزة
والمفقودة في زماننا


كانت عندما تبدأ بالحديث عن ذلك الزمان.. الراحل دون عودة ، ألمس بكاءاً خفياً .. دموع تتساقط مع الأحرف

هي تتمنى عودة تلك الأيام الغارقة بالسعادة على الرغم من عدم امتلاكهم لشيء يوحي بالسعادة
ولكنها كانت تلك الروح المميزة

تلك كانت مصدر سعادتهم
وتعاستنا
..


في احدى تلك الزيارات كانت متوعكة قليلاً ، فامتنعت عن حديثها الشيّق واكتفت بكلمات قليلة ، عن سؤال أبي عن آخر الأخبار كونها لم تبرح منزلها نتيجة مرضها
أثناء ذلك، كنت أبتسم لها بود

لم أكن كثيرة الكلام، ولازلت كذلك حتى يومنا هذا
أكتفي بالاستماع والابتسام

أثارت ابتسامتي فضولها

فبادرت بسؤال والدتي عن سر ابتسامي لها دونما سبب مقنع

كان جواب والدتي: حقوقية تضحك لج وتضحك للكل

هنا فقط، بادلتني الابتسامة و اخبرتني بأنّها أحبت نظرتي لها وابتسامتي

...

اعتدت على الابتسامة منذ الصغر
ابتسم للجميع دونما هدف

ابتسم لمجرد الابتسامة ولا أظن أنه يجب تقديم أسباب داعية لذلك وإن كان في الوقت الراهن هناك بعض التحفظات على ابتسامتي
ولكنها تبقى دون هدف واضح


أكثر الأشخاص الذين أستمتع بالابتسامة لهم و يبادلونني إياها بعفوية
"الأطفال"

ابتسامتك تعني دخول القلعة المحصنة من بابها
بمجرد الابتسامة
تمتلك قلوبهم وحواسهم
يهدونك أسرارهم قبل ألعابهم


يا لسخرية القدر

تلك القلوب الصغيرة اليانعة
تمتلكها بابتسامة

وقلوبنا حجارة صماء
لا تهزها ريح عاتية
الصورة من موقع لقطة دوت كوم
 
posted by 78o8eYa at 4:25 PM | Permalink | 15 comments
Friday, December 15, 2006
>> أدوّر مرسى لأحزاني <<
أسافر وارحل بيأسي
أدوّر مرسى لأحزاني

أنسى يومي و أمسي
أحب و اعشق من ثاني

أسمع بس صدى حسي
يضيع كل فرح(ن) لفاني

تشتاق لي جروح نفسي
وأنا الذي منها اعاني


***


أصبّح بهمي و امسّي
رحل بي هناك وخلاني

اختلط ليلي بشمسي
غريب ..والغربه عنواني

أخاوي بوحي وهمسي
كلمتي شحيحه المعاني

تجفي احلامي و تقسي
ودنيتي كلها أماني


***


أسافر و ارحل بيأسي
أدوّر مرسى لأحزاني

أبحر و مركبي يرسي
لحدود ديرتك ودّاني

ألا يا حبي المنسي
أشتاق لك بشوق أشجاني

أهواك وهواجيس نفسي
تخسّرني أغلى فرساني



اهداء و تنويه

في البوست السابق ، كتب الأخ
7osen
أول بيتين مذكورين بالأعلى و طلب مني الاكمال
و بناءاً على طلبه تم كتابة ما تم قراءته أعلاه
أتمنى أن تنال الرضا و القبول




"الصورة من موقع لقطة دوت كوم"
 
posted by 78o8eYa at 9:42 PM | Permalink | 9 comments
Sunday, December 10, 2006
'3eeeer !

ودي أرحل
ولا تسألني وين بـ أروح
.
أمنع سنين عمري من الذبول
أحمي نفسي من الجنوح
.
مليت من أنصاف الحلول
ذاب قلبي من الجروح
.
أرتجي فرحة تطول
وألملم بقايا حب وده يروح
.
.
****
.
.
مالي مكان ، وصرت غريب بـ هالمدينة
.
ليش كل ما قلت قرّبنا .. أكتشف محد يبينا
.
هذا حالي .. تايه في بحر من غير مينا
.
.
****
.
.
ودي أرحل
.
لازم أرحل
.
ولا تسألني وين بـ أروح
.
.
==============================
.
.
كتبت هذه الكلمات في لحظة يأس
.
.
أتمنى أن لا يكون تعليقكم قاسي بقسوتها
هي
مجرد خلجات نفس متعبة
تم الإفراج عنها في
31-1-2005
Monday
.
.
.
قريبة مني
بقربي منها
 
posted by 78o8eYa at 8:50 PM | Permalink | 16 comments
Friday, December 08, 2006
يا فرحة أيامي تعالي

أهرب من عالمي المجنون .. المشحون

" إليه "

.

.

أملأ رئتي بنسائمه المشبعة بآهات العاشقين

أحتمي برماله حيث وطأتها قلوب أتعبها الحنين

أعبث بأصداف لفظها .. كذكرى تبقى على مر السنين

.

.

أتأمله بعين طفل

أسرَه ذلك الأزرق الصافي الجميل

اعتاد اللعب على شواطئه

وجمع هداياه المتناثرة هنا وهناك

....

مترقباً لما هو أعظم من مجرد أصداف

هو ينتظر الفوز

>> بالـدانة <<

.

.

.

*************

.

.

.

لازلتُ أذكر ، اصطحابه لي بسيارته

تجولي معه على البحر

نظراتي الخجلى

وابتسامته الواثقة

سؤاله : تحبين تسمعين المسباح؟

تجيبه إبتسامتي بنعم

.

*ينشد المسباح يا فرحة أيامي تعالي

.

يفاجئني بإخراج عطر نسائي* من بين الأشرطة المخزنة بالصندوق الأمامي

ينثر عبيره على كفي

.

.

ويهديني إياه

.

.

يبقى معي ، كذكرى

لخروجنا معاً في ذلك اليوم

المخزن في الذاكرة منذ ما يقارب العشر سنوات

.

.

.

اعتدت على العطر وأحببت الأغنية

.

.

لازلتُ أذكرها

في مثل هذا الوقت ، من كل سنة

.

.

بالأمس إلتقيته

لقاء اسبوعي معتاد

.

الأسرة بجميع أفرادها مجتمعة

.

.

أقترب منه

.

.

أُقرّب منه زجاجة العطر و أسأله

تذكره

؟

ترتسم البسمة على وجه

في حين تنظر له زوجته متسائلة عن العطر

يجيبني

بيييه .. ليما ألحين عندج

؟!

أُخبره

كل سنة أشتري لي يديد ، عشان يظل معاي و يذكرني فيك

.

.

.

كما الشريط السينمائي ، أذكر سؤالي لوالدتي وإجابتها لي

يمه .. والله آنا أحبه ، شفيكم تضحكون علي

تضحك وتجيبني

لأنه خالج

!

.

.

.

.

واليوم، أنا التي تضحك على السؤال الغبي و الحب الخيالي

مع عدم إغفال

عشقي للعطر و للأغنية

والذكرى

^_*

.

.

.

عطر : جان بول غوتييه -كلاسيك *

المسباح - يا فرحة أيامي تعالي *

http://www.6arab.net/GetRamFile/singers/131.ram

 
posted by 78o8eYa at 4:16 PM | Permalink | 16 comments
Tuesday, December 05, 2006
Miss U .. :(
i Miss U ..

and U know about that ,

it's my First day , hope GOD help me until FRIDAY !

that means 3 days left .. how can i wait ?!
:S




>> ENG-Q8iya <<
.
.
take a good care of your self & Enjoy ;)
.
.
-=-=---=-=-=-=---=-=-
.
.
" 7aYoTa "
is leaving too ..
:(
hope she's gonna get well Soon
sorry cuz i could't say take care ..
i just can't !
:'/
.
.
-=-=---=-=-=-=---=-=-
.
.
تسافر لآخر الدنيا .. وتطلب مني ما أشتاق
تدوّر راحتي وإنتَ .. تبي تروح و تخليني
شـ سوي بصورتك عندي ..شـ سوي بكل هـ الأوراق
إذا يغنيك عني شي .. فلا شي عنك يغنيني
****
شـ سوي له ، وَله قلبي .. على قلبك وصدري ضاق
شـ سوي إن صارت الدنيا .. صغيره بعدك بعيني
من أشرح له ، من أحكي له .. من أشكي له ألم الفراق
ومن غيرك في هـ العالم .. يعرف شلون يهديني
****
تخيّل غيبتك عني .. تخيّل حرقة الأشواق
وتعرف ليه أترجاك .. ايدينك تبقى بيديني
حبيبي لا تخليني .. عذاب الوحده ما ينطاق
ذبحني الخوف من الفرقا .. ويا ليتك تحس فيني
V
V
V
http://www.6arab.net/GetRamFile/singers/197542.ram

 
posted by 78o8eYa at 8:07 PM | Permalink | 0 comments
Saturday, December 02, 2006
القيادة فن و ذوق و أخلاق- update
shelnaa el pic cuz my sweety 6la3at men elmostashfaa o 9arat a7san ^_^
-----------------------------
--------------------------------
-----------------------------
"القيادة فن وذوق و أخلاق"

هالعباره وايد أحبها

مع إنها تعبر عن أشياء كثيره ضايعه بشوارعنا

القيادة صارت للأقوى
حرب شوارع منتشرة
سباقات ولا الفورمولا
الكل له قوانينه المرورية الخاصة فيه
محد مهتم بأحد
الكل يقول
يا الله نفسي


أول كلمة سمعتها من الوالد لما استلمت سيارتي - من ست ست سنين تقريباً - قالي كلمه ما أنساها ويومها ضحكت عليها :
يا بنتي الله يحفظج من هالسياره ، حطي في بالج وإنتي تسوقين إن اللي يسوقون معاج بالشارع ميانين مهدودين و إنتي الوحيده العاقله بينهم ! ..

ومع الوقت و الدعمات اللي صادفتني، حسيت بصدق كلمة الوالد- الله يحفظه
فعلاً الميانين مهدودين هدد بالشوارع
ما أدري منو الغبي اللي عطاهم الليسن
ما أدري شلون أهلهم أو معازيبهم معطينهم سيايير وهادينهم يلعبون سيارات يتداعمون
والمشكلة مو أي سيايير .. سيايير تعور القلب تروح بيد عليميه و سواق دايخين

ما أمدح بنفسي و بسياقتي بس إهي مره وحيده اللي كنت آنا غلطانه والسبب كان مسج ، ومن يومها بطلت أكتب مسجات و آنا أسوق ، والحمدالله كانت دعمه خفيفه .. تزلق بسيط بالدعامية الأمامية
;p

أغلب الدعمات تكون من غيري ، قاعده أمشي بأمان الله وفجأة أندعم
يا بريك فجائي
أو واحد دايخ مو منتبه إن سيارتي واقفه بالإشارة و يدش بالدعامية الورانية
أو بنت عنونه معطينها جيب عود ، و تبي ترجع قري .. وعلى قولتها ما شافتني وراها !! أوكي سيارتي صغيره بس عاد مو لدرجة إنها ما تنشاف
..


قبل أسبوع أو أكثر، على خط فحيحيل جدام مستشفى الهادي كان في سياره شفر قديمة ومغيمه ، ألمحها وراي من بين السيايير تبتون بشكل مو طبيعي .. سبااااق
كنت بأقصى اليسار ماشيه بسرعة 130 و المسافه بيني و بين السياره اللي جدامي كافيه بس ما تسمع بوجود سياره بينا ، و صلت الشفر على يميني

فجأة لفت يسار علي ! .. خلاص أهو قرر يدش بين السيارتين
طبعاً شكلت هرنات وتترك وأهو ولا على باله مكمل الأخ .. بغيت أدش بالصبه لوما ربي ستر
!
وباجي السيارات ترنع هرنات جنهم يزفونه على استهتاره
يا خي إنت ودك تموت بالطقاق
آنا شنو ذنبي .. وأهلي ما عندهم غيري





هذا كله يعني مقدمة حق السالفه اليايه
،،،



يوم اليمعه بعد ما تريقت وناشبت أخوي الصغير على ريوقه ، صعدت عند أمي أقرا الجرايد .. و إهي كانت تقرا بمصحفها ..

وآنا أقلب بالجرايد لمحت خبر عن وفاة شاب بأواخر العشرينات بعد تفحمه بسيارته السبورت على شارع الخليج بسبب السرعة

لا حول ولا قوة إلا بالله .. الله يرحمه و يصبر أهله
:(

تلتفت علي الوالده و تسألني : شنو .. شصاير ؟

أقرا لها الخبر ، يتغير لونها و تدعي له بالرحمه ، و تقولي كلمتها المعهودة : هذي السرعه وما تسوي ، الله يحفظكم .. ما تقدرو تمشون بدون ما تسرعون جنه لاحقكم أحد .. و بالذات إنتي تحبين تطيرين بهالسياره ، ما أدري شـ وراكم ؟

أرد عليها : يمه آنا شكو ألحين ! كاني قاعده شحلاتي مجابلتج ، و بعدين آنا بطلت أتسابق .. اعتزلت المهنة ، الله يعافي (...) -أخوي راعي الكورفت- ماسك عني كل السباقات و مريحني
وأضحك ... ^_^

ترد علي: إنتي تضحكين وآنا اللي ماسكه قلبي بيدي لي طلعتو ، و أقول الله يردهم بالسلامه

.
.
.
.


بعد فترة
طلعت من غرفتي لأني بزور بيت عمي العود ، أتغدا عندهم
ولقيتها على قعدتها و مصحفها بحضنها ،

يمه آنا رايحه تآمرين على شي
؟


سلمي عليهم و ديري بالج و إنتي تسوقين

إن شاء الله ، الله يسلمج من الشر ، يوصل
يعني ما قلتيلي .. شرايج فيني
؟
;p

جنج البخت ، الله يحفظج


مع السلامه



أستمتع بالطريج بين المطر اللي يرشرش و البريدات ، مع رويشد يغني : خسرت وهذي الدنيا .. و يعني لو تخونيني ..أجل بعدين كيف أربح لو ما أحسب خساراتي ..كبيره حيل في حقي ..طفله و لعبت فيني ..ولكن وش نقص أو زاد ..غلطه في ملفاتي


وصلت بيت عمي ، كان الجو العام ممتع
استانست بوجود يدتهم أم أمهم- الله يطول بعمرها و يخليها لهم
طيبة لدرجة الشفافية
حنووونه حيييل
تذكرني بيدتي- الله يرحمها - نفس القلب .. نفس الروح

أحفاد عمي ، كانو قمة بالإبداع

والقعده مع بنات عمي أكيد غير
..


مر الوقت بسرعه و دقت الساعة معلنة رحيل سندريلا


طلعت من بيتهم بإتجاه بيتنا

وبالطريج كلمت الوالده كالعاده ، وصتني أمر أخوي الصغير في بيت صديقه أو عند الملعب القريب عشان أرده البيت


أول ما دخلت المنطقة ، لمحت عرس بصالة الأفراح القريبة من قطعتنا ، طبيعي يكون زحمة سيايير
كانت السيارات صافطه يم الرصيف على الشارع بالسايد اليمين ، و كنت أمشي بسيارتي على السايد اليسار
كان الشارع سايدين بس
..


وآنا أمشي حركت سياره على يميني
وصرنا نمشي مع بعض بـ خطين متوازيين تقريباً
آنا على اليسار
وأهو على اليمين

طبعاً شارع داخلي و السرعة بسيطة

كان على يساري لفة
U-tern
من حق الشارع الثاني ، يعني إحنا ما يجوز لنا نلف فيها

فجأة
قررت السياره على يميني إنها تلف بهاللفه
..

برييييييييييييييييييييك قوي مني

أشوف سيارتهم تقرب علي أكثر
وتدش بسيارتي من جدام
وتسحبني معاها حق اللفه

دخنه
دخنه .. تطلع من سيارتي

جنه سيارتي بنجرت
..

توقف سيارتي باللفه

والجيب يكمل يمشي لي الشارع الثاني
وشوي
شوي
يخفف
ويوقف

ثواني
..
وأستوعب
إني اندعمت
وبغيت أنشال بسيارتي
واللي دعمني موجود بالشارع الثاني
وآنا باللفه واقفه
!!!!

ما أدري شلون دست بسيارتي و لحقته لي الشارع الثاني ووقفت وراه
..

أبي أنزل بس الحزام ماسكني مسكه عدله
والبيبان مقفوله

أتهاوش مع الحزام بفتحه
و البيبان بكسرهم عشان تتبطل

وأنزل له
..


لا شعورياً قمت أصرخ عليه

إنت شسويت !! .. ما تشوووووووووووووووف
؟!
شلتني آنا و سيارتي و لا جنه في أحد يمك

بروحك تمشي بالشارع

بروحك تقرر تلف و تلف ، ما تلتفت على أحد ولا تقول أطل في أحد يمي

لا إشاره لا بطيخ

بس بتلف وتلف .. سهالات السالفه

من أقصى اليمين لي أقصى اليسار و اللفه مو لك
داش رونق سايد على لفة يوترن مو من حقك تلفها
وشايل سيارتي معاك ولا حتى توقف
وقفت قلبي ، حسبي الله عليك
زين جذيه ألحين



صرخت و صرخت و زفيت وآنا حاطه إيدي على قلبي
..
أحسه بيطلع من مكانه

الجو البارد أحسه قلب حر .. لاهوب



ماكنت أسمع أحد غير صراخي و دقات قلبي


بعدين انتبهت إنه قاعد يتعذر و يقول لي

الحمدالله على سلامتج اختي
انتي ما فيج شي .. ؟! انتي ما فيج شي
؟!

الحمدالله بالحديد و لا بالعبيد
سامحيني و الله أدري إني غلطان
والله آنا غلطان .. و عذريني بس ما شفتج
اللي تبينه آنا حاضر
..

تبين نسويها قضية ما عندي مانع
تبيني أصلح سيارتج آنا حاضر


اللي تآمرين عليه بسويه
بس إنتي هدي شوي ، ذكري الله


لاحول ولا قوة إلا بالله العلي العظيم

قلبي يعورني ودقاته تزيد .. دمي نشف وريجي نشف من الصراخ و الخرعه

انطر خلني أفكر شنو أسوي

آنا ناطرج .. فكري باللي يريحج و آنا حاضر

أبي أدق على أبوي وتتفاهم معاه

اللي تبينه آنا حاضر، تبيني أكلم أبوج وإلا ريلج آنا حاضر

قلتلك تكلم أبوي .. انطر أدق عليه

إن شاء الله .. دقي عليه
وأتصل على الوالد
رنتين و يشيله ، بعد السلام أسأله

يبه وينك فيه؟
قريب من البيت، خير إن شاء الله شـصاير؟
خير .. آنا كنت راده البيت ودعمني واحد وطيّر خشة سيارتي
أهو يدري إنه غلطان
ويقول اذا تبين أصلحها لج أو نسويها قضية
..
كلمه و تفاهم معاه
إنتي شلونج؟
آنا ما فيني شي
بس قلبي وقف وماني قلدره أفكر بشي
سلااامات ، وينج فيه ألحين و شلون صار الحادث ؟
بعد الشرح ، كلم الصبي وتفاهمو
..
خلال مكالمته ، كان صاحبه يحاول يعني يهديني
اختي الحمدالله إنها يت بالحديد لا فيج ، انتي طولي بالج شوي وهدي
تبين أييب لج ماي
مشكور !..
صدقيني أهو ما شافج
!!
الله يهداك شنو ما شافني ؟ ليش سيارتي نمله .. قلنا صغيره بس عاد مو ما تنشاف
وبعدين آنا مو ماشيه مسكره ليلاتي
وأنتو داشين رونق سايد ، هاللفه مو لكم .. بكيفكم بتلفون
عاد تصدقين أهو كان يقولي، ودك نلف وندعم أحد
؟!
عصبت زياده
لاوالله .. يعني تدرون انكم غلطانين وداشين رونق سايد
وتلفون ولا عندكم مشكله
بالطقاق بالأوادم
ولا معطين اشاره
ولا ملتفتين حتى
أقل ما فيها ، أبي ألف .. ألتفت على اللي يمي
أجيك على الشارع .. فيه قطو آدمي مار
مو أنتقل من اليمين لي اليسار بدون ما ألتفت
لااا وأدش رونق سايد على الشارع الثاني
!!!
خلص صاحبه من المكالمة مع الوالد
رجعلي تلفوني
وخلااااص
كل من يروح بطريجه
وآنا تميت واقفه
أطالع سيارتي ، شلون طارت عيونها
وصارت عوره
!
كسرت خاطري
..
طيرو خشتها وقلبو معالمها
حسبي الله عليهم
أسمعه يقولي
حصل خير اختي وإن شاء الله الوالد بيكلمني باجروما يصير إلا كل خير
توكلي على الله
ألتفت عليه
ايه .. حصل خير
وحرّك سيارته
وحرّكت سيارتي
ورديت البيت
وكل اللي صار لي أحسه يمر من يديد
مثل الشريط المعيود
..
أوصل البيت
..
متعوده أصفط سيارتي قري
هالمره صفطتها بالويه
خشيت الدعمه
..
ونزلت منها أتمقلها عدل
عورني قلبي زياده
دخلت البيت
تستقبلني أمي
الحمدالله على السلامه، مريتي أخوج ؟ يبتيه معاج .. ؟
أول قوليلي خطاج السو
......
شنهوووووو ! شفييييج ؟؟
دعمني واحد وطيّر سيارتي معاه
وتييني تركض تتلمسني
عسى ما فيج شي ، عسى ما تعورتي بس ... فيج شي ؟
لا ما فيني شي الحمدالله ، سيارتي اللي فيها
طارت خشتها وراحت عيونها
يمه قلبي أحسه انشلع من مكانه ، قلبي يعورني
حسبي الله عليه
اسم الله على قلبج ، ما فيج إلا العافيه إن شاء الله
بالحديد ولا فيج
شلون صار الحادث ووين ، آنا توني مكلمتج ما فيج شي
..
وأقص لها القصة من أول ما لف علي
........
طبعاً السياره تتحرك ما فيها شي بس ما توايه كلش !
شكلها يفشل
فـ ليما تطلع سيارتي من المستشفى راح تتولى الوالده مهمة توصيلي من وإلى الدوام ، مثل الياهل اللي يوصلونها أهلها المدرسة ويردون يآخذونها
...
أمي يعني تبي تهوّن علي، تقولي بعد ما نوصل أخوج مدرسته أتمشى فيج على البحر .. ويمكن تعزميني على الريوق بعدين أوديج دوامج ، ماما تعزم روحها بروحها .. يحليلها
^_^
ووفت بوعدها .. صار لنا يومين نتمشى على البحر ونتفرفر بمواقف شرق بعدين توصلني الدوام ، ونااااسه
;)
وما قصرت أنجي وصلتني أمس من الدوام ليما بيتنا بسيارتها العجيبة ، طبعاً مآخذين طريج البحر
^_*
-=-=-=-=-
الدروس المستفاده من هالسالفه المأساة
:
* مو الحريم اللي ما يعرفون يسوقون وفيهم نسبة كبيرة من التهور، الرياييل ترا أكثر من الحريم وبشكل واااااضح هذا بناءاً على عدة تجارب ودعمات
-------
* الحوادث نتيجة لسببين لا ثالث لهما ، الاستهتار أو عدم الانتباه .. الاستهتار إنك تسوي حركه إنت مو قدها ولا مقدر نتايجها ، وعدم الانتباه واضحه .. يا سرحان بخيالك أو مع راديو أو موبايل
-------
* الميانين زايدين بالشوارع فـ ديرو بالكم وربي يحفظكم ويردكم لأهلكم سالمين وكاملين
--------
* حزام الأمان لوما أهو جان دشيت بالسكان .. حبيبي اللي لايمكن أسوق بدونه ، وفى معاي وما خاني ، لاتنسون تربطون الحزام لأن فيه الأمان
-------
* الدخنه اللي طلعت من سيارتي واللي على بالي إنها دخنة مكينتي وإني راح أموت بالسياره مثل راعي الحادث بالجريده -الله يرحمه ، طلعت دخنة توايري من قوة البريك .. فـ يا جماعه جيكو على توايركم ولا تبخلون على عمركم بتواير سنعه
-------
* كل شي مقدر ومكتوب ، ولا يرد الحذر القدر ولكن صنائع المعروف تقي مصارع السوء ، نصيحه
كثرو من صدقاتكم حتى لو كانت خرده .. وحطو في بالكم كل شهر انكم تتصدقون لأن الصدقة تطفيء غضب الرب
-------
* حاولو ما تطلعون من بيتكم إلا وانتو متأكدين إن أهلكم راضين عليكم ، لأن رضا الله من رضا الوالدين ودعاؤهم سحر يعمل المستحيل
--------
* سيارتي عزيزه علي حيل ، إهي هدية تخرجي من الثانوية من أبوي ، وااااايد فكرت إني أغيرها وآخذ لي وحده يديده .. باب واحد وتكون بي أم عشق المراهقة
;pP~
لكن آنا لي تعودت على الشي ما أحب غيره .. بعدين إهي عرفتني وآنا عرفتها
صارت بينا عشرة عمر ومحبة متبادلة
عاشت معاي أيام ومواقف ما تنسي
كانت شاهد مهم على أحداث مؤثرة بتاريخي المجيد
:))
شهدت على فصلاتي ومحاتاتي أيام الدراسه
يا كثر ما راحت وردت تودي ناس وتشيل أغراض ولويه
..
إهي عزيزه بمعزة اللي يابها لي
وإهي عزيزه بمعزة الأيام اللي قضيناها سوا
واليوم تأكدت شـ كثر أحبها وأعزها
..
.
.
.
كلمة حق لازم تنقال
...
ماني من اللي يبيع وقت الشده
آنا معاج يا أعز عزيزه على الحلوه والمره
وإن شاء الله بتطلعين بالسلامه
وبترجعين أحسن من أول وأحلى
.
.
.
.
في الختام
،،
مالي غير الدعاء لكم بالسلامه في الطريج .. وحافظكم الله
تنويه : الصوره بعدسة
ENG-Q8iya
نقول لها ، شاكرين لكم حسن تعاونكم معنا
;P
*****************************
Update
الوالده أمس بعد ما وصلت أخوي الصغير النادي ، واهي بطريجها راده البيت
كانت فوق مطبه
واندعمت
!!
المره قاعد تمشي فوق مطبه ، طبيعي إنها مو دايسه شي و ريلها على البريك
يعني ليت البريك شاب من ورا
بكل سرعه اييها واحد مطيور ويدخل بسيارتها و يكسر الدعاميه
..
يوم قالت له ، لا تقول ما شفتني بعد آنا سيارتي جدامك
يرد عليها: والله بالي مو معاي ، ما شفتج
!!!
حياتي ظهرها يعورها من قوة الضربه
:(
.....
الوالد يقول : ماكو غير أشتري لج همر و أشتري حق أمج واحد ثاني عشان محد يدعمكم
;pP~
.
.
.
.
.
.
الله يستر من الثالثة
:/
 
posted by 78o8eYa at 8:43 PM | Permalink | 25 comments