Sunday, November 01, 2009
>> IT'S A BABY GIRL<<


** بفضل من الله رزقت بـــ " بنوته " في يوم الأحد الموافق 9/8/2009 **

قطيوه .. مثل هذي

;p نفس التصفط وحركة الريل .. الشعر وأهم شي المثاوب 24/24 بس مو مثل الخشم أكيد ^_*



بنتي كانت خايفه تطلع ، 12 ساعة من المعاناة مع الولادة الطبيعية رغم إن كل الأمور كانت ماشيه تمام
تطل علينا شوي وترد تتعلق ، كانت مآزرتني بإحساس الرهبة والخوف ... يمكن علشان كل شي صار بسرعة بسرعة
:)

بعد المعاناة اقترحت دكتورتي "شفط البيبي" ، هالاقتراح قوبل بالرفض الشديد المصحوب بالدموع من أمي وخالتي المتضامنين معاي بغرفة الولادة
من ناحيتي، حيييل كان بخاطري أبجي وأنفّس شوي عن الألم .. بس لما شفت الكبار يبجون بلعتها وسكت
!!
:/

الدكتورة قالت بحزم
: C.S
------->
عملية قيصرية ! @@ ، الدموع زادت والمعارضة اشتدت .. بكل هدوء قلتلهم:
قدّر الله وماشاء فعل، أهم شي بنتي ما تتعب زيادة وين أوراقهم علشان أوقعها مع إن مافيني حيل أوقع


** تمت العملية القيصرية بسلام ، خلال أقل من ساعة الحفيدة شرّفت وكانت بين ايدهم ، والحمدلله على كل حال **

في الأشهر الأخيرة من الحمل كانت نفسيتي تعبانة من الثقل وتغيير ملامحي وشكلي، في المستشفى تعبت بغرفة الولادة- بالصدفة اهي نفسها اللي دخلتها قبل ولادتي أستكشفها- ، ما بين ألم طلق وولادة متعسرة وبين ألم جرح وعملية
كلها تهون عند الأم ولا إنها تتألم من شوفة ضناها جدامها ولا تقدر تشيله وتلمه على صدرها، هذا كان أقسى ألم مر عليّ بحياتي
صعب هالشعور ...
وغريب بنفس الوقت
بعد العملية والإفاقة، بغرفتي منسدحه بفراشي ولا أقدر أتحرك أمي شايلتها علشان أشوفها، أقولها: قربي خدها يم خدي أبي أشمها وأبوسها
بهاللحظة بجيت .... رغم كل اللي صار من بداية الطلق وحتى الولادة كنت متماسكة و "قوية" مثل ماكانوا يقولون لي، لكني بهاللحظة انهرت.. انهارت كل قوة فيني وحسيت إني ملكت الدنيا لما فتحت عينها بعيني


** فترة النفاس = كآبة + أكل + رضاعة + نوم **

مطيعة جداً .. بـ أكلي ، كل شي يطلبونه مني أسويه ، كل اللي ينحط جدامي أغصب نفسي وآكله ، أتحامل على ألم الجرح وأمشي شاده ظهري
"مو علشانج... علشان بنتج" هالكلمه على طول أسمعها
وعلشانها متحمله وساكته
أكره الروتين اليومي (أكل-رضاعة-نوم-أكل-رضاعة-نوم) لكنه يهون عند الحــكــــره ! ... ودي أعرف الحكمة من الحبسه ؟ آنا ما غلطت لما ولدت .. ليش يعاقبوني ويحرموني من الطلعه ، غير مواعيد المستشفى ماكو شي
أظل بشر ومحتاجه أغير جو/ أماكن وأشوف الدنيا


** الناس..و آآه من الناس :// [قلة ذوق وانعدام احساس – هدايا عجيبة غريبة – إعادة اكتشاف شخصيات] **

المعروف عني إني إجتماعية بطبعي ، أحب الناس ومخالطتهم لكن ... التغيير اللي نتج عن الحمل زاد حبي للإنفراد والتقوقع على ذاتي ، هذا مع الملل من التعليقات المتكررة على شكلي
اللي الناس مو قادره تفهمه إني أشوف عمري بالمنظره على كل حزه فـــ ... آنا شايفه وساكته ، يعني مو ناقصني أحد يذكرني بالأخطاء السبعة إذا ما كانوا أكثر :/ .. واللي قهرني زياده إني مو من النوع الملقوف إللي يسأل عن خطوة النملة يعني بالمختصر: مالي شغل بأحد وكنت أظن بالغلط إن الناس مالها شغل فيني بس للأسف طلع العكس
أكثر سؤال كان "يفوّرني" :- إنتي ليما ألحين ما ولدتي ؟! .. جنّه الولادة على كيفي ومتى ما بغيت ://
بعد الولادة كان الوضع مختلف تماماً
بكل حسره أقولها بالكويت عندنا ماكو أي خصوصية للوالدة ، كل الناس تبي تتحمد بالسلامه يزاهم الله خير وكثر خيرهم بس لازم نفكر بهالمره اللي ولدت وتعبت تبي ترتاح على الأقل 24 ساعه .. نخليها تصحصح وتفتح عينها وترد روحها علشان تستوعب القرقره اللي بتصير فوق راسها ، وتقدر تتحمل الناس الداشه والطالعه بكل حزه بدون أي مراعاة لوقت راحه أو وقت نوم ... مع العلم إن موعد استقبالي كان بعد طلعتي من المستشفى في بيت أبوي والكل عنده خبر بهالشي ، المقربين من الدرجة الأولى بس اللي كان المفروض إييوني المستشفى
مو قصدي ما أبي أحد، بس مهم إنهم يراعون حالتي ويحترمون رغبتي بالخصوصية ولو شوي
كانت هالفترة إعادة إكتشاف شخصيات .. القريب صار بعيد ، والبعيد صار قريب
ناس احتجتهم ما لقيتهم ، وناس ما هقيتهم صارو قراب مني حيل
اللي كانت روحي تسبقني له وأهديه من عمري ولا يهمني غير رضاه وشوفة الضحكة شاقه حلجه .. هملني ! وأهداني البايت من هداياه وأشياء تفشل الصراحه كنت وآنا أفتح الهدايا أغشي من القهر ومنقص ويهي جدام أمي وأنا أقولها: شفتي فلانه شهاديتني !...
الواحد ما عليه قاصر والحمدالله ، بس المثل يقول:" آنا غنيه وأحب الهديه " ، وحلو تعرف قيمتك عند حبايبك
في ناس حتى ما كلفو نفسهم يتعذرون بمسج أو حتى يباركون
في ناس خجلوني بطيبة قلبهم وفاجئوني بمكانتي بقلبهم
في ناس لو شنو بسوي ما راح أوفيهم حقهم ولا أطلع من يزاهم


** في الختام .. :) **

كل اللي انكتب فوق ، مكتوب من شهر رمضان ، ولظروف الأمومة تأجل نشره إلى اليوم .... بنتي شاغله كل وقتي ، متحضنتها وماعندي وقت لنفسي ، سامحوني إذا قطعت عنكم
ماعندي خدامه تعاوني ، وخلال شهر بـ استقل بشقة
ادعولي ربي يسهل علي
ويصبرني ...... الأمومة مو سهلة أبداً ، فالجنة تحت أقدام الأمهات لا تأتي بسهولة

^_^


،، كلمة أخيرة ،،
برّوا بأمهاتكم
قبلوا أيديهم ورؤوسهم
وادعوا لهم في صلواتكم بالصحة والعافية و العمر المديد



 
posted by 78o8eYa at 2:00 AM | Permalink |


7 Comments:


  • At 9:15 AM, November 01, 2009, Blogger نون النساء

    واااااي يا حيااااتي
    الضنى يبيله من يتحمل عشانه
    بس علشان نشوفه بعيونه


    عسى ربي يطرح فيها البركه يااارب
    وحمدالله على سلامتج ومبروووك ما ياج حبيبتي

     
  • At 1:28 PM, November 01, 2009, Blogger 7osen

    الف مبروك على البيبي
    تستاهلين كل الخير والله

    البوست مؤثر حيل خصوصا لحظة الدموع

    الله يخليها لج إن شاءالله

    وديري بالج عليها عدل مثل ما قلتي مو بسهولة الجنة تصير تحت اقدام الامهات لازم تهتمين وتصبرين وتسهرين وتتعبين عليها

    وبالأخير أقولج مرة ثانية

    الف مبروك على البنوته
    بس ما قلتي لنا شنو سميتيها ؟؟

     
  • At 6:46 PM, November 01, 2009, Blogger Eluded Euphoria

    الف الف مبروك ان شاء الله تتربى بعزج.. والحمدالله خطاج الشر. كل شي ايهون عشان النونو.. مثل ما انتي قاعده تشيلينها الحين.. اهي باجر بتشيليج..
    ان شاء الله يارب الله ايسهل عليج دربج ^^

     
  • At 11:52 AM, November 10, 2009, Blogger AuThoress

    مبرووووووووووووووووك
    يا ربي ، ما احلى هالشعور :***

    لينا نشوف هالبدر الحلو ... شنو سميتيها؟



    مباركة هذه البنت .. الهدية

     
  • At 4:29 PM, November 27, 2009, Blogger 7osen

    كل عام وانتم بخير

     
  • At 2:41 AM, December 19, 2009, Blogger 78o8eYa

    كثير الشوق اللي بقلبي
    كثر حبات المطر

    مشتاقه لكم
    و
    أحبكم
    ;)


    ---------

    نون النساء


    غاليتي نون
    ربي يسلم عمرج
    ونباركلج إن شاء الله عن قريب :)
    شعور لا يوصف ، أتمنى كل البنات يعيشونه
    صج إنه مو هيّن ومعاه تعب
    بس
    ماله مثيل
    ^_^

     
  • At 2:59 AM, December 19, 2009, Blogger 78o8eYa

    7osen

    صديق المدونة المخلص :)
    ربي يبارك بعمرك ، مشكور وما قصرت
    لا توصي حريص .. شايلتها بعيوني
    عايشه لها وعلشانها

    وشنو سميتها، لأنك طلبت ما راح أردك
    ^_^
    سميتها
    :
    (( وضــحــه ))
    ومعناه
    الناقة البيضا الصغيره

    على اسم الغالية يدتي- الله يرحمها


    -=-=-=-=-=-

    brown-suger

    مشكوره حبيبتي ، الله يبارك فيج
    تصدقين ما فكرت إنها تشيلني .. كل تفكيري شلون أقدر أشيلها وأحافظ عليها
    ربي يقدرني ... الله كريم


    -=-=-=-=-=-

    AuThoress

    هلا وغلا بالغلا كله :*
    ربي يبارك بعمرج
    والله كان ودي تشوفينها ، للمرة الأولى بالتاريخ ما أقدر أحضر المعرض ... حيييل تضايقت :/
    إن شاء الله بتشوفينها ، لازم تشوفينها
    مثل ما تقول الوالدة: هدية
    بمعناها
    كـ هدية
    و
    كـ طفلة هادية
    :))

    سميتها : (وضحه) ، وومن ضمن أسامي الدلع
    (بدره)
    ^_*


    -=-=-=-=-=-


    7osen

    وإنت بألف خير وصحة وسلامة
    ولو إنها
    كـ العادة
    متأخرة جداً
    :$