Saturday, April 28, 2007
( تموت واقفة )

تنمو وتترعرع داخل أرواحنا

تكبر معنا
ونكبر معها

..

كالبذرة اليتيمة التي تم انتزاعها من بين أحضان الطبيعة
يتم غرسها فينا

ترتوي من دمائنا
وتستنشق آهاتنا
وتستظل بدمعاتنا

تصل بجذورها إلى أعماق أعماقنا
تزيّن بخضارها مساحاتنا الجرداء

تنشر شذاها في أنحاء قلوبنا
تنثر بريق عطائها في واحاتنا



بها نتجمّل ، وتتجمل بنا

بها نتباهى ، وتتباهى بنا


نستظل بها من حرارة أيامنا
ونرتوي من خالص حنانها
ونستشعر بأغصانها تضمنا
وبأوراقها تسترنا




بين
لحظة خائفة/خاطفة .. يتم اقتلاعها

ولحظة عاجزة/ فائزة تكون ثورتها


تغلبنا
أو نغلبها
أو تغلبها أزماننا


تنتصر
أو ننتصر
أو تنتصر أوهامنا

ترجو
أو نرجو
أو ترجو أحلامنا


ترحل
أو نرحل
أو ترحل بأيامنا



رغم فقدانها
تبقى

شامخة تبقى

فالأشجار لا تموت إلا واقفة

.. قد عانت الكثير ، وتستحق أن تظل فينا باقية




**اهداء **
إلى كل من تم
قتل/ سلب
طيبته/طبيعته
عن سبق اصرار وترصد







الصورة اهداء عزيز من

"NaNy"

عاجزه عن الشكر حياتي
^_*
 
posted by 78o8eYa at 8:15 AM | Permalink | 18 comments
Saturday, April 21, 2007
"تقوقع"

نظراً لسوء الأحوال الجويه
ونتيجه لتردي الأوضاع النفسيه

وبما أن الهدوء المطبق تتبعه العاصفه


كان يوم الخميس الموعود

شاهد حي على انفجار القنبله الموقوته


***


الزمان : صباح يوم الخميس


المكان : ساحل الكوت وما يجاوره


الحدث : انفجار المشاعر على هيئة << موجة ضحك ممزوجة بهوس شرائي غير طبيعي
***




Eng-Q8ya
راح أستخدم مصطلحج الأثير .. وأقول :-

" أعاني من حالة تقوقع "



من مده طويله أعاني من هالحاله ، فقدان الرغبه ... بكل شي


وأكثر شي ... الاختلاط مع الناس


أميل للهدوء ، جداً أميل للهدوء



لكن الميلان تحول إلى ادمان


وسائل اتصالي بالأخرين تعطلت بالكامل
فقدت جميع وسائل الاتصال

وما اعتقد عندي رغبه باسترجاعها أو أفكر بإصلاحها


بالفتره الحاليه على الأقل ، معتزله الحياة الاجتماعيه ومريحني هالاعتزال


أشخاص محدودين اللي أتواصل معاهم .. أقرب الناس لي

بدون تواصلهم .. متأكده ما أقدر أعيش



ومن بين كل هالعفيسه واللويه اللي أمر فيها



قررت

إني أفرغ شي من اللي بداخلي


وأطلعه


لأني ما أقدر أقمته داخلي أكثر من جذيه



فـ كان القرار


..

..

..


طلعه مع بنات العم يوم الخميس بهدف الريوق والتمشي و تغيير الجو الكئيب





كانت في بدايتها هاديه


..
..

ريوق لذيذ ..

بالنسبه لي كان أحلى ريوق ، لأني قاعده آكل بشهيه مفتوحه

ومجابله أحلى بنات عم
...
الله يخليهم حقي ولا يحرمني منهم

..

ماني ذاكره عن شنو كنا نتكلم طول القعده بس كانت نقاشات مضحكه

لازم أضحك :- لأني طالعه مع أكثر بنتين يضحكوني
!
:D


اللي أذكره عدل ، إن عجبتني حيل حركة ديكور السقف .. ذكرتني بديكور قاعة الحفلات بفندق موفنبيك

خام أبيض مزموم ومرفوع بالنص ومثبت فيه ثرية كريستال نوعاً ما كبيره

شكلها بالكافيه كان جداً راقي ..


..

طبعاً حريم وموجودين بسوق ، ما نقدر نقاوم وما نتسوق

تشرينا جم شغله ، بالنسبه حقنا كانت ضروريه

بس الوضع بهالمحل كان مغاير تماماً لما كانت الخطه الخمسيه ماشيه عليه


..

أهو محل كنت أتمنى اكتشفه .. كل مره الوالده تتعذر بأي عذر علشان تقنعني بعدم الدخول
لكن

هالمره قدرت أقنعهم إناّ نطل .. لاحظو

مجرد .. طله
ونطلع


..

ودخلنا

وياريتنا ما دخلنا ، هذا اللي كانت تقوله وحده منهم

لأني ما بغيت أطلع
وأبي أشتري اللي بالمحل كله
..

^_*

..

كل قطعه كانت تناديني

وآنا ما أقدر أرد أحد يطلبني


كنت عايشه بلحظه ورديه وموسيقى هاديه

أتنقل بين الزوايا ، وأحاول أيمّع كل شي عاجبني
بس كنت محتاره
حيره مزعجه

لأن كل شي
كان عاجبني
وأبي آخذه


وفجأه أسمع أحد يقول

ماراح تآخذين غير شيين ، مايصيرين تشيلين اللي بالمحل كله

مالج غير شغلتين وبس

..

لحظتها حسيت نفسي ياهل قاعد بالجمعيه وملقّط كل الحلاو وتييله أمه وتصرخ عليه:
ماراح تآخذ غير شيين ، ما يصير تشيل الحلاو كله
مالك غير شغلتين وبس


انطفت الموسيقى وصارت الأحلام رماديه ، لحظتها بدت الفصله الصجيه

قمت أترجى ترجي ، وأتدلع و أتنهوص أزيد من اليهال
إني أبي أشتري أكثر من مجرد شيين

واكتشفت بعد فتره إن شكلي كان يضحّك
لأن مو بس اللي معاي كانو يضحكون..
..
..

وبعد شد
و رد
..

قدرت أطلع من المحل بأربع قطع
;)


كنت أبي أشتري بعد ، أكيد ما ترضيني أربع قطع
بس كانت نتيجه مرضيه بالنسبه للمعركه الخفيه اللي صارت بالمحل

طلعنا منهم وايتسامة النصر تعلو محياي

والضحك والتنطز متواصل بين بنات العم
على شكلي و نبرة صوتي و تبريراتي

..
..

كنا نبي نطلع يعني بطريجنا للسياره

وطول الطريج وحده منا توقف عند مكان و الباجين يسحبونها سحاب
..

الجريمه الأخيره كانت

دخلتنا لمحل كيك

كل كيكه عنده تقول :- الزود عندي

بعد تفكير عميق و مشاورات ومداولات

اخترنا كيكتين

خذيت وحده ، علشان الزواره اللي تأخرت عليها .. وأهم شي
أراضي فيها أمي عن التأخير

والثانيه كانت من نصيبهم علشان زوارتهم اللي متأخرين عليها بعد


آخر محطه قبل السياره

كانت بـ المطحنه

آنا مع وحده من بنات العم داخل ، متقلقصين مع جياسنا
نفتر بالمطحنه ونسأل اللي يشتغل عن جم شغله

والثانيه واقفه بره عند الباب وتطل علينا وتأشر لنا بدون صوت بحركة : ماصارت .. طلعو ، لوعتو جبدي .. ذبحتوني



وبعد ما خذينا منه المطلوب

طلعنا


طول الطريج لي السياره كنا نتكلم جنه قاعدين بروحنا

كلنا كنا نضحك بوقت واحد على كل وحده منا

ومع جياسنا- أو أثقالنا .. نحوس بالموقف ندوّر السياره اللي ما ندري وين منخشه


لين نلقاها ونركب السياره ، ومسلسل الضحك الهستيري متواصل طول طريج الرده حق البيت

تجدر الإشاره إلى أن نتيجة الضحك والتكركر أثمرت

اصابتي بالـ" بو فهاق" طول الطريج
;$

غير موقف المحل اللي صرت فيه طماشه ، وحديث المجتمع اللي ما راح يخلص

الـ "بو فهاق" القوي اللي حاشني ، كان مسوي جو شكل ثاني


وليما وصلت البيت
وآنا أضحك بروحي على صباحي الغير
والمضحك الممتع


...



هالرحله علمتني وأكدت لي أكثر من شغله مهمه
:

وجود الناس القراب منك واللي فعلاً يحبونك بدون هدف ، يحبونك لمجرد إنهم يحبونك له تأثيره الكبير في التخفيف عنك

التصرف بحريه وجنك شخص مخفي ، محد يشوفه ، يخليك تتحرر من كل قيودك وتطلق العنان لجنونك وتعيد احياء
طفولتك المدفونه


مره قريت إن الحريم يفرغون غضبهم وضيقهم بالسوق ، كل ما شرو أكثر يرتاحون أكثر ، بعد اللي جربته يوم الخميس أأكد على صحة هالشغله ، لأني وااايد ارتحت لمجرد إني طلعت من السوق محمله بالجياس

انك تخفي ضيقتك بصدرك وتدفنها بقلبك تأثر مو بس على صحتك ، تأثر على كل اللي داير مدارك .. تجنب كبت المشاعر لأنك الخاسر الوحيد

لازم تخصص يوم بالاسبوع أو بالشهر حقك .. حق نفسك ، تسوي فيه اللي بخاطرك ، تقعد بالمكان اللي يريحك ، تطلع مع ناس ما تتكلّف بمعاملتهم لأن هالشغله بتمحي كل الثقل مال الاسبوع أو الشهر

البعد عن الناس غنيمه ، تبتعد عن القيل والقال ، تحتجب عن الأضواء المسلطه عليك ، تختفي من المجهر اللي مركزينه على راسك لكن لو بتفكر فيها .. الناس تتكلم بسالفه ومن غير سالفه ، الناس ما عندهم غير الحجي
ليش أخلي حجيهم يوقف حياتي ويعزلني لمجرد إني أسكّت لسان عمره ما راح يسكت ؟

ماكو شي بهالدنيا إيي بالساهل ، تنجرح شوي وتنذبح شوي علشان توصل بالنهايه لـ اللي تبيه .. أهم شي إنك توصل بالنهايه لـ اللي تبيه ، هذا أهم شي


*****



وفي نهاية هالتقرير اللي من زمان مو كاتبه واحد مثله

بغيت أقول كلمه صغيرونه حق أغلى اخت
:

آنا ما أقدر أستغنى عنج
ولو إني متقوقعه بس بالي معاج ، وأعتذر على التقصير

..
..



الصوره المرفقه من أعز الصور عندي ، معنونتها بـ
What ever
وللأمانة الأدبية هي من مجموعة أبو نواف البريدية
 
posted by 78o8eYa at 12:11 AM | Permalink | 18 comments
Monday, April 16, 2007
لحظة هروب مني

بعد معاناة في الوصول

..

أصل


حيث الهدوء المطبق

والهواء العليل

وتحليق أسراب الحمام


وأمواج البحر الساكنه


هي على غير عادتها اليوم

ساكنه

كـ حالي



لطالما أحببت هذه البقعة من الأرض

حيث ألملم شتات نفسي

وأكشف عن خفايا نفسي

وأعيد إنعاش نفسي






أحلق مع الحمام في الفضاء الفسيح
دون قيد يجبرني على الوقوف حيث أنا

أحلق عالياَ
حيث الغيوم تحيطني
كذراعي أم تضم ابنها المدلل

أحلق بعيداً
حيث أجد حريتي
المفقودة
أو
المسلوبة


أبحر بين تلك الأمواج
التي ترحل بي حيث الضفة الأخرى


فأجد جميع أحلامي قد تحققت
وجميع أوهامي قد تلاشت
وجميع أحزاني قد تبخرت




وبين لحظة وأخرى

أغمض عيني
فأنصت لما تبوح به الريح

أستمتع بهمسها

و

أبتسم


...
...





*******




أبتعد وأرحل

لفترة بسيطة بالمقارنة مع ما أعانيه
من تعب جسدي ونفسي


أبحث "عني" المفقودة

وأحاول التخلص "مني" الدخلية


صعب علي ان لا أملك القدرة على تمييزي

فأتوه

وأَضيع


وأبحث

عني




...


وحتى أجدني


لي عودة




******



الأسطر السابقة كتبت في صباح هذا اليوم
من مكاني المفضل- المركز العلمي


في لحظة هروب من جميع الالتزامات


في لحظة صمت








مجرد توضيح:

التعب من دوامي ، والهروب كان لأحضان الحبيب وهمساته
أظن بأن الحالة ستنتهي مع شروق شمس الغد


لا أراكم الله مكروه
ولا أضاع لكم روح
 
posted by 78o8eYa at 9:40 AM | Permalink | 9 comments
Monday, April 09, 2007
" عطش البحر "





تجدون هنا

بقايا بوح

وهدايا جروح

وعطايا روح


...

بين الهمسه و البسمه
تبرز بالسطر
دمعه


بين حبر القلم
و جمر الألم
تنصهر شمعه




******



ألمحه عن بُعد

يتأرجح بين كافة الاتجاهات

يمضي ..

رغم استمرار رحلته
وعدم انقطاعها طوال الفترة الممتدة منذ ولادته

إلا أن

آثار خطواته باقية

صدى كلماته خالدة

نفحات عطره صامدة



أينما يذهب

تهمس لك الزوايا بمروره من هنا



قلبه الزاخر بنبضات شقية لا تعترف باليأس ولا تعرف الصمت

روحه المفعمة بالعطاء اللانهائي حيث العطاء بلا مقابل

عقله الراجح الواعي لجميع ما ينزوي بجانبه



يحاول جاهداً إخفاء تميزه عن الآخرين

غالباً ما يتظاهر بجهله وقلة معرفته


لكن، نور القمر الساطع لا يمكن إخفاؤه

ولا نكرانا عمق البحر الهادئ

ولا تجاهل شذى الياسمين الفواح



تنجلي الغيمة الضبابية عن سمائه
فتظهر حقيقته المجردة


انه الأسطورة الخرافية
والبطل الخيالي


انه ذلك الحديث الذي لا يمكن تصوره واقعاً ملموسا



..
....
.......
...........


إليه أهدي الأسطر السابقة ، مرفقة بكرت يحتوي على ما يلي :


عندما يُطالب البحر بالارتواء
ويدعي العطش


...
...



عندها ،


ما الذي بإمكاننا تقديمه ؟
 
posted by 78o8eYa at 3:34 PM | Permalink | 12 comments
Tuesday, April 03, 2007
"الجو شاعري "
الجو خيالي
و شاعري
يخلي الثلج يذوب
..
..
مجرد نظره للسما
وتأمل في الغيوم
وأشكالها العجيبه
"سبحان الله"
..
تخليك تهذي بحروف
غير قابلة لـ الإكمال
:
:
هذي بعضها
**********
:
:
آنا غير
:
:
:
بكل حبي الكبير
:
:
بكل شوقي الكثير
:
:
بكل دمعي الغزير
:
:
:
كلي أنا أسير
:
:
ودوم بدربك أسير
:
:
أتحدى واقعي العسير
:
:
وبسماك تلقاني أطير
:
:
***********
:
:
افتح للحب دريشه
وحط للهم شريجه
العمر مره بنعيشه
..
لا تقضيه بكدر
!
....
....
*********
تجرح بقلبي .. و أبتسم
أحبك .. وأحب منك الألم
*********
أنا ، أبي صوتك
وانت ، تبي صورتي
أنا ، أحب حرفك
وانت ، تحب شوفتي
...
...
***********
:
:
أحبك
مالي هَنا إلا بقربك
ولو فكرت إني أسلاك
أنسى روحي .. وأحبك
 
posted by 78o8eYa at 6:43 PM | Permalink | 15 comments
Sunday, April 01, 2007
! أعجبك في كل شي .. إلا الزعل

أعجبك في كل شي

.. إلا الـــــــزعــــــــل !


قلبي طول العمر
عايش في سلام

لو تخاصمني
أخاصمك بغزل

ولو تراضيني
..
أجاذبك
الــغـــرام



لك حبيب الروح
في قلبي محل

يحرسك .. يحميك
من ظلم الغرام

ما يجيك الضيم
افرح و احتفل

دام أنا يا زين
تحملني العظام


أعشقك لاشفت
بعيونك خجل

وان بعدت الشمس
بعيوني ظلام

وارتعش لا جيت
وبعيونك وجل

كن بين العين
والنظره .. خصام
!



ما يتوه اليوم
عني من سأل

عاشقك معروف
من عطر الخزام

لو يروح العمر .. باقي لي أمل
ألمس القمره أراضيها و أنام
..



http://gulf.salmiya.net/songs/aseel/ram/aseel22.ram



********
:
:
ما أعرف أزعل
..
..
ولا أحب الزعل
:
:
:
والقريب مني
يعرفني
......
....
..
بس ساعات الواحد ظروفه تحكمه
..
..
وتجبره
:
:
إنه يزّعل حبايبه منه
:
:
:
:
مو بكيفه
و
لا برغبته
:
:
.....
.....
لكن
:
:
اللي يحبك
عمره ما يزعل منك
::
::
يسامحك
..
يعذرك
..
ويمكن
يراضيك
:
:
:
وآنا ما أقدر أقول غير
:
:
:
:
:
:
" الله لا يجيب الزعل بينك و بيني "
 
posted by 78o8eYa at 5:30 PM | Permalink | 13 comments