Saturday, April 21, 2007
"تقوقع"

نظراً لسوء الأحوال الجويه
ونتيجه لتردي الأوضاع النفسيه

وبما أن الهدوء المطبق تتبعه العاصفه


كان يوم الخميس الموعود

شاهد حي على انفجار القنبله الموقوته


***


الزمان : صباح يوم الخميس


المكان : ساحل الكوت وما يجاوره


الحدث : انفجار المشاعر على هيئة << موجة ضحك ممزوجة بهوس شرائي غير طبيعي
***




Eng-Q8ya
راح أستخدم مصطلحج الأثير .. وأقول :-

" أعاني من حالة تقوقع "



من مده طويله أعاني من هالحاله ، فقدان الرغبه ... بكل شي


وأكثر شي ... الاختلاط مع الناس


أميل للهدوء ، جداً أميل للهدوء



لكن الميلان تحول إلى ادمان


وسائل اتصالي بالأخرين تعطلت بالكامل
فقدت جميع وسائل الاتصال

وما اعتقد عندي رغبه باسترجاعها أو أفكر بإصلاحها


بالفتره الحاليه على الأقل ، معتزله الحياة الاجتماعيه ومريحني هالاعتزال


أشخاص محدودين اللي أتواصل معاهم .. أقرب الناس لي

بدون تواصلهم .. متأكده ما أقدر أعيش



ومن بين كل هالعفيسه واللويه اللي أمر فيها



قررت

إني أفرغ شي من اللي بداخلي


وأطلعه


لأني ما أقدر أقمته داخلي أكثر من جذيه



فـ كان القرار


..

..

..


طلعه مع بنات العم يوم الخميس بهدف الريوق والتمشي و تغيير الجو الكئيب





كانت في بدايتها هاديه


..
..

ريوق لذيذ ..

بالنسبه لي كان أحلى ريوق ، لأني قاعده آكل بشهيه مفتوحه

ومجابله أحلى بنات عم
...
الله يخليهم حقي ولا يحرمني منهم

..

ماني ذاكره عن شنو كنا نتكلم طول القعده بس كانت نقاشات مضحكه

لازم أضحك :- لأني طالعه مع أكثر بنتين يضحكوني
!
:D


اللي أذكره عدل ، إن عجبتني حيل حركة ديكور السقف .. ذكرتني بديكور قاعة الحفلات بفندق موفنبيك

خام أبيض مزموم ومرفوع بالنص ومثبت فيه ثرية كريستال نوعاً ما كبيره

شكلها بالكافيه كان جداً راقي ..


..

طبعاً حريم وموجودين بسوق ، ما نقدر نقاوم وما نتسوق

تشرينا جم شغله ، بالنسبه حقنا كانت ضروريه

بس الوضع بهالمحل كان مغاير تماماً لما كانت الخطه الخمسيه ماشيه عليه


..

أهو محل كنت أتمنى اكتشفه .. كل مره الوالده تتعذر بأي عذر علشان تقنعني بعدم الدخول
لكن

هالمره قدرت أقنعهم إناّ نطل .. لاحظو

مجرد .. طله
ونطلع


..

ودخلنا

وياريتنا ما دخلنا ، هذا اللي كانت تقوله وحده منهم

لأني ما بغيت أطلع
وأبي أشتري اللي بالمحل كله
..

^_*

..

كل قطعه كانت تناديني

وآنا ما أقدر أرد أحد يطلبني


كنت عايشه بلحظه ورديه وموسيقى هاديه

أتنقل بين الزوايا ، وأحاول أيمّع كل شي عاجبني
بس كنت محتاره
حيره مزعجه

لأن كل شي
كان عاجبني
وأبي آخذه


وفجأه أسمع أحد يقول

ماراح تآخذين غير شيين ، مايصيرين تشيلين اللي بالمحل كله

مالج غير شغلتين وبس

..

لحظتها حسيت نفسي ياهل قاعد بالجمعيه وملقّط كل الحلاو وتييله أمه وتصرخ عليه:
ماراح تآخذ غير شيين ، ما يصير تشيل الحلاو كله
مالك غير شغلتين وبس


انطفت الموسيقى وصارت الأحلام رماديه ، لحظتها بدت الفصله الصجيه

قمت أترجى ترجي ، وأتدلع و أتنهوص أزيد من اليهال
إني أبي أشتري أكثر من مجرد شيين

واكتشفت بعد فتره إن شكلي كان يضحّك
لأن مو بس اللي معاي كانو يضحكون..
..
..

وبعد شد
و رد
..

قدرت أطلع من المحل بأربع قطع
;)


كنت أبي أشتري بعد ، أكيد ما ترضيني أربع قطع
بس كانت نتيجه مرضيه بالنسبه للمعركه الخفيه اللي صارت بالمحل

طلعنا منهم وايتسامة النصر تعلو محياي

والضحك والتنطز متواصل بين بنات العم
على شكلي و نبرة صوتي و تبريراتي

..
..

كنا نبي نطلع يعني بطريجنا للسياره

وطول الطريج وحده منا توقف عند مكان و الباجين يسحبونها سحاب
..

الجريمه الأخيره كانت

دخلتنا لمحل كيك

كل كيكه عنده تقول :- الزود عندي

بعد تفكير عميق و مشاورات ومداولات

اخترنا كيكتين

خذيت وحده ، علشان الزواره اللي تأخرت عليها .. وأهم شي
أراضي فيها أمي عن التأخير

والثانيه كانت من نصيبهم علشان زوارتهم اللي متأخرين عليها بعد


آخر محطه قبل السياره

كانت بـ المطحنه

آنا مع وحده من بنات العم داخل ، متقلقصين مع جياسنا
نفتر بالمطحنه ونسأل اللي يشتغل عن جم شغله

والثانيه واقفه بره عند الباب وتطل علينا وتأشر لنا بدون صوت بحركة : ماصارت .. طلعو ، لوعتو جبدي .. ذبحتوني



وبعد ما خذينا منه المطلوب

طلعنا


طول الطريج لي السياره كنا نتكلم جنه قاعدين بروحنا

كلنا كنا نضحك بوقت واحد على كل وحده منا

ومع جياسنا- أو أثقالنا .. نحوس بالموقف ندوّر السياره اللي ما ندري وين منخشه


لين نلقاها ونركب السياره ، ومسلسل الضحك الهستيري متواصل طول طريج الرده حق البيت

تجدر الإشاره إلى أن نتيجة الضحك والتكركر أثمرت

اصابتي بالـ" بو فهاق" طول الطريج
;$

غير موقف المحل اللي صرت فيه طماشه ، وحديث المجتمع اللي ما راح يخلص

الـ "بو فهاق" القوي اللي حاشني ، كان مسوي جو شكل ثاني


وليما وصلت البيت
وآنا أضحك بروحي على صباحي الغير
والمضحك الممتع


...



هالرحله علمتني وأكدت لي أكثر من شغله مهمه
:

وجود الناس القراب منك واللي فعلاً يحبونك بدون هدف ، يحبونك لمجرد إنهم يحبونك له تأثيره الكبير في التخفيف عنك

التصرف بحريه وجنك شخص مخفي ، محد يشوفه ، يخليك تتحرر من كل قيودك وتطلق العنان لجنونك وتعيد احياء
طفولتك المدفونه


مره قريت إن الحريم يفرغون غضبهم وضيقهم بالسوق ، كل ما شرو أكثر يرتاحون أكثر ، بعد اللي جربته يوم الخميس أأكد على صحة هالشغله ، لأني وااايد ارتحت لمجرد إني طلعت من السوق محمله بالجياس

انك تخفي ضيقتك بصدرك وتدفنها بقلبك تأثر مو بس على صحتك ، تأثر على كل اللي داير مدارك .. تجنب كبت المشاعر لأنك الخاسر الوحيد

لازم تخصص يوم بالاسبوع أو بالشهر حقك .. حق نفسك ، تسوي فيه اللي بخاطرك ، تقعد بالمكان اللي يريحك ، تطلع مع ناس ما تتكلّف بمعاملتهم لأن هالشغله بتمحي كل الثقل مال الاسبوع أو الشهر

البعد عن الناس غنيمه ، تبتعد عن القيل والقال ، تحتجب عن الأضواء المسلطه عليك ، تختفي من المجهر اللي مركزينه على راسك لكن لو بتفكر فيها .. الناس تتكلم بسالفه ومن غير سالفه ، الناس ما عندهم غير الحجي
ليش أخلي حجيهم يوقف حياتي ويعزلني لمجرد إني أسكّت لسان عمره ما راح يسكت ؟

ماكو شي بهالدنيا إيي بالساهل ، تنجرح شوي وتنذبح شوي علشان توصل بالنهايه لـ اللي تبيه .. أهم شي إنك توصل بالنهايه لـ اللي تبيه ، هذا أهم شي


*****



وفي نهاية هالتقرير اللي من زمان مو كاتبه واحد مثله

بغيت أقول كلمه صغيرونه حق أغلى اخت
:

آنا ما أقدر أستغنى عنج
ولو إني متقوقعه بس بالي معاج ، وأعتذر على التقصير

..
..



الصوره المرفقه من أعز الصور عندي ، معنونتها بـ
What ever
وللأمانة الأدبية هي من مجموعة أبو نواف البريدية
 
posted by 78o8eYa at 12:11 AM | Permalink |


18 Comments:


  • At 3:19 PM, April 21, 2007, Blogger PearL

    تصدقين هالحالة حايشتني صايرلها فترة

    بس مادري ليش
    حتى مالي خلق اعالجها
    مع اني اعرف علاجها


    :)
    حلوة الطلعة مع ناس تحسينهم قريبين لج
    تحسين بطبيعية
    بعفوية
    الواحد ما يحسها الا مع نفسه

    :)

     
  • At 5:39 PM, April 21, 2007, Blogger sologa-bologa

    مع إن القصة طويلة
    بس فيها معلومة حلوة تفيد معشر الرجال

    المرأة تفش زعلها وغضبها بالسوق والمشتروات

    يعني أيها الرجال المتزوجون
    لا تزعلون حريمكم
    لأن المصرف راح يزيد

    :))


    الحمدلله على العزوبية


    ودمتم بحب وود

     
  • At 8:07 PM, April 21, 2007, Blogger ReLaaaX

    شوفي دامج مستانسه ومرتاحه .. وربي لك الحمد تعرفين الصح والغلط وماسويته



    ماعليج من اي كائن حي :)






    الله يتمم عليج وناستج وفرحتج .. والحمدلله كاج شحلوج احلى حقوقيه





    وبعد ياربي شكنت بقوووول





    قوليلنا عن محلج بو 4 اقطع ;p







    :)





    يقول حبيبي صلى الله عليه وسلم



    ان لبدنك عليك حقااا



    او كما قال عليه الصلاة والسلام




    ^_^



    احنا اللي كاشتين باعمارنا الحمدالله والشكر






    بس خلاص عيل كل ماشفناج ضايق خلقج بنقولج روحي السوق:>

     
  • At 10:15 PM, April 21, 2007, Blogger Cr8ivia

    الله يدوم عليج الوناسة يارب
    و الدروس اللي طلعتي فيها اوافقج عليها 100%
    الله يخليلج بنات عمج و يديم المحبه :)

    ماكو شي يسوا ترا

     
  • At 1:05 AM, April 22, 2007, Blogger david santos

    Thanks for you work, is very good, and have a good weekend


    اشكركم عمل جيدة ونهاية الاسبوع

     
  • At 5:47 AM, April 22, 2007, Blogger KoOoOoOoKTeeL

    السلام عليكم

    يعطيج العافيه اختي =78o8eYa=

    صراحة اشكرج على هالموضوع

    وبالصدفه دخلت بلوقج

    واستمتعت جداً

    ولفت انتباهي لما دخلت عن طريق قوقل
    مقال لج عن معرض الكتاب
    وعن بحثج لبعض الكتب
    من بينها كتب للأديبه / بزة الباطني

    عاد قلت افيدج ... لو كنتي من معجبيها

    بأن هي راح تكون ضيفتنا طول هالفتره على منتدانا
    www.Hanoon.ws

    وإذا حابه تطرحين عليها بعض الاسئلة

    وأعذريني على تطفلي لصفحتج

    و والله شكلي ضعت بـ هالبلوق اول مره ادش لوول

    بس كا حاولت اسوي لي بلوق علشان اسجل اليوزر والباسورد حق تعليقي اهني ونشوف بعدها سالفة البلوق والطريقة لوول

    مع تحيات

    أخوج

    ~ كوكتيـل ~
    KooKTeeLK@Hotmail.com

     
  • At 5:55 AM, April 22, 2007, Blogger KoOoOoOoKTeeL

    خيتو .. ترى ضيعت وخبصت بعدما سويت بلوق
    شلون الطريقه؟

    اتمنى تساعديني لوول

    ومنكم نتعلم

    وياليت نتواصل عالإيميل او المنتدى
    المهم بس اعرف الطريقه لوول


    وسوري على اللقافه


    الف شكر

     
  • At 3:35 PM, April 22, 2007, Blogger AuThoress

    تذكرت شكل عينيك "الطفلتين" بينما تصفين ضحكاتك المجنونة، امرحـــي يا عزيزة، فليس أجمل من ممارسة "إنسانيتنا" كيفما احببناها...كوني أنتِ دوماً، دون أن تشغلي تفكيرك بأحدهم، كوني انت بكل الطهر الذي تحملين/وأذكره رغم لقاء يتيــم، اتمناه يتكرر


    ودّ لكِ

     
  • At 4:31 PM, April 22, 2007, Anonymous eng-q8iya

    a3tereflech .. enni en9edamt mn 3enwaan el post ! o gabel la anzel ta7at gelt baini o bain nafsi, enshalla ma akoon "ana" maw'6oo3 el post ... etta8aw8o3 o asaleeb etta7arror mennah :D

    bOg ashkara ;p waain 78oo8i el adabiya waaain ? :)

    ...

    el post waayed 7elo ... ta5aiyalt kel kelma feeh, garaitah o chenni mo sam3a eSaalfa mennich :) endemajt feeh le darajat enni sema3t el pink music elli sema3teeha bel ma7al ! 5osh la7an :)

    3asaha dom hal'6a7ka el7orra elli bedoon 8eyood :D

    o 9adgay enni akthar wa7da afham elli etmorreen feeh le2anni actually 9aarli fatra ga3da a3eeshah ! 8a9di el ta8aw8o3 wel en3ezaal 3an el 7ayat el ejtemaa3iya el 5alya mn ay ma3na ...

    at8aw8a3 bs galbi o 3agli ma3aach ...

    o ana ma az3al ;)


    ella an nata7arrar mn hal ta8aw8o3 .. take care !

    ENG-Q8iya

     
  • At 8:38 PM, April 22, 2007, Blogger 7osen

    حلو الاحساس بالحريه والانطلاق والتصرف على نحو مغاير عن العادة

    خصوصا اذا كنتي مع ناس ترتاحين لهم

    والاجمل الاشياء اللى علمتج اياهم هذي الرحلة
    واحلى شي ان النساء يفرغون غضبهم وضيقهم بالشراء

    والله زيييين 0


    بوست جميل

     
  • At 5:56 PM, April 23, 2007, Blogger 78o8eYa

    Pearl

    اسم الله عليج من هالحاله
    إن شاء الله ما عليج إلا العافيه ، حاله وتعدي على خير

    وااايد حلوه
    ^_^

    شرايج تجربينها مع ناس قراب منج، أتمنى تخفف شوي من الوضع

    وطمنينا يا اللولو
    ;)


    -=-=-=-=-


    Sologa-bologa

    أكييييد الحمدالله على العزوبية
    ألف مره
    :)

    ما أعتقد تقدر تقارن حياة العزوبية بحياة الزواج

    فـ الفرق واضح ، حياة العزوبية
    حياة الحرية

    والزواج قيد

    وإن كان قيد جميل لكن يظل قيد
    ..

    ذكرتني بنقاش مع صديقه متزوجه ، حاولت إنها تقنعني بفكرة مصروف الزوجه من زوجها
    وآنا رافضه بشكل قطعي

    بالنسبه لي ما أقبل إن أي أحد يصرف علي .. حتى لو كان شخص قريب مني لدرجة الزوج

    فـ ما أعتقد راح يتعب عريس الغفله من حالات تقوقعي وتوابعها
    ;p

    ودمتم بعزوبيه خاليه من المصاريف الغاليه
    :)


    -=-=-=-=-

    ReLaaaX

    تسلمين
    حبيبتي إنتي

    ربي لا يحرمني من كلامج الحلو
    :)

    ومحلي بو أربع قطع ما أقدر أقولج عنه
    علشان ما يصير إعلان غير مدفوع الثمن
    كافي المخاسير اللي اندفعت فيه
    ;pP

    عفيه لا تقولين بروح السوق كل ما ضاق خلقي

    عزة الله طار المعاش
    و
    طار حساب التوفير وراه

    :)))


    -=-=-=-=-


    Cr8ivia

    حيا الله من يانا
    :)

    آمين عزيزتي
    أجمعين

    وربي يخلي لج حبايب دنياج ولا يحرمج منهم


    -=-=-=-=-


    david santos

    You are welcomed , thanx 4 passing by ..
    :)

     
  • At 7:39 PM, April 23, 2007, Blogger 78o8eYa

    KoOoOoOoKTeeL

    وعليكم السلام و الرحمه

    أهلاً وسهلاً بكم في عالم المدونات

    البلوق المتواضع يرحب بالزوار
    وما أعتقد كان هناك أي تطفل

    شكراً على افادتنا بشأن استضافة الأديبة/ بزه الباطني
    شاكره لك أخوي

    و شكراً على اشادتك بمواضيعي

    وبشأن الضياع والتخبص
    آنا مستغربه
    إن التعليق عندي ما يتطلب وجود بلوق شخصي أو وجود باسوورد ويوزر نيم
    يخليك تبني لك بلوق و تبتلش بتأثيثه

    إلا اذا كان البلوق رغبه شخصيه
    ..
    ..
    وبالنسبة للمساعده

    ما حددت نوع المساعده بالضبط ، علشان أقدر أفيدك

    ..
    وما أعتقد إني الشخص المناسب للسؤال عن بلوقر لأني بكل بساطه كل يوم أتعلم شي يديد
    أخبص
    وأتعلم

    :)

    وبالنسبة للتواصل عن طريق الايميل أو المنتدى
    أعتذر لكن ما أحبذ التواصل بغير طريق البلوق

    ..

    حياك الله أخوي


    -=-=-=-=-


    AuThoress

    بكل صراحه

    "اشتقنا"
    ..
    كان لقاء عابر لكن أثره باقي
    وأتمنى فعلاً تكراره

    أظن بأنني سأتواصل بطريقه أخرى
    ^_^

    طلاتكِ تلامس روحي
    كـما حروفكِ

    لكِ ألف تحيه بعبير الياسمين مرويه



    -=-=-=-=-


    My EnGi

    esmella 3alaich men el2n9edam o rab3aa , a'6en kafy eTa8aw8o3 ! LOL ;p

    o ba3dain ma77ad b0g ashkara !! .. hatha o ana gaylaa enny ra7 aqtebes menech mo96ala7ech el2atheer + enty mertazza bel bon6 el3areee'9 N red ! ;pPp

    hathaa esmaa : Tebelly ashkara ! LOL ;p

    7ayaty enty , U 2 enshalla doom ha'9a7ka el7orra elli bedon 8eyood .. ;D

    eee enty ma3ay , doom ma3ay
    B galby o Broo7y .. alla la ya5leeny enshalla

    U 2 , take a good care of your self my dear

    P.S : waaayed 7abait hal comment o farra7ny , thanx Sis :*


    -=-=-=-=-


    7osen


    هالاحساس وايد حلو
    لأن اللي معاك ناس مرتاح لهم

    التصرف على نحو مغاير للعاده يفضل يكون مقرون بصحبه تعين وتعاون على هالشي
    :))

    على فكره
    اكتشفت إن في رياييل بعد يفرغون ضيقهم وغضبهم بالسوق
    ..
    بس ما أعتقد النسبة تقارن بنسبة الغالبية من الحريم


    الأجمل أكيد ، كتاباتكم الأخيره

    دمتم دون معاناة عشق

     
  • At 12:08 PM, April 24, 2007, Blogger Smile

    يحليلج كاتبه حجي حجي وااايج .. كل اللي بداخلج طلعتيه .. ماكو احلى من الريوق بره البيت ومع الناس اللي تحبينهم
    يا حلو وناستج تونس
    ايه والله السوق صاير شي مو طبيعي
    يلا طلعتي باربع شغلات احسن من الثنتين
    ان شاء الله التهنين فيهم

    حلوه النصيحه .. انني ما اكب مشاعري
    مشكوره

     
  • At 10:03 PM, April 24, 2007, Blogger ana_sokkarah

    شي حلو وشي جميل حبيبتي هالشغله اللي صارتلج والمهم انج تعلمتي منها الكثير والأهم انج تغلبتي على التقوقع وطلعتي اللي بداخلج واتمنى انج ارتحتي

    عسى الله يسعدج ويهنيج ويخليلج حبايبج حوالينج ولايفرقكم عن بعض

     
  • At 11:41 PM, April 25, 2007, Blogger Nescafé

    وناسه احلى شي اصلا هالطلعات اللي تكونين فيها مع الناس القراب منج
    بعفويتج .. بدون اي قيود

    عسى دوم هالوناسه
    بس بدون صرف فلوس
    خوش دعوه ها ;P

     
  • At 11:42 AM, April 26, 2007, Blogger Q8ya

    اهم شي انج تنعنشتي حبيبتي....عليج بالعافيه...^___*

    اشلج ابحجي الناس ...على قولتج حجي الناس ما يخلص...فعيشي حياتج...:)

     
  • At 1:15 PM, April 27, 2007, Anonymous Manooya

    هاااااي حقوقة شلونج قلب ^__^

    وستج ونسني وااايد حسيت جنه انا بين ربعي لانه نفس الشعور ونفس الريأكشن وسالفة التسوق يريح الاعصاب هذي اوافقج عليها 10000% =)

    المهم انج استانستي ولا تخلين شي يعكر مزاجج وعلى قولتج الناس ما عندها غير الحجي ,, فعيشي حياتج ^__-

     
  • At 9:43 AM, April 28, 2007, Blogger 78o8eYa

    Smile

    حياج الله :)
    اي والله مو مخليه شي مو كاتبته
    !
    :$
    تسلمين عزيزتي
    العفو ولو
    وحياج الله بأي وقت
    :)



    -=-=-=-=-

    ana_sokkarah

    يزاج الله خير
    مشكووووره على هالدعوه الحلوه
    أجمعين يا رب
    ^_^


    -=-=-=-=-

    Nescafé

    أهلاً أهلاً
    :)

    وين هالغيبه ؟ ما حنيتي للبلوقر
    ..
    ترا احنا حنينا واشتقنا
    :$

    اي بدون صرف فلوس
    !
    LOL ;p

    إن شاء الله ماما نسكافيه
    ;)
    لا تقاطعين
    ^_^


    -=-=-=-=-


    Q8ya

    حيا الله من يانا
    :*
    منخشه ، من زمااان ما شفناج
    عسانا ما نفقدج من شر
    ..
    الله يعافيج و يخليج

    ونستني شوفتج عندي
    عوديها
    :)

    -=-=-=-=-


    Manooya

    أهلييييين
    من وين طالعه الشمس اليوم
    ؟

    منوي ولهااانه عليج
    ..
    تدرين اني كل اسبوع أتفرفر عندج
    وأقول جود كاتبه شي
    ..
    لا تطولين الغيبه
    ما نقدر على الفراق

    ربي يسمّح دربج ويحفظج
    :)