Sunday, March 11, 2007
~!~شعلي أنا من الناس وشعلى الناس مني ~!~

هل أفكر بشكل مختلف ؟ ..

غالباً ما يداهمني هذا السؤال ظاهراً على قسمات وجهي عند الانتهاء من أي حوار يجمعني بوالدتي


هل يتغير التفكير من جيل إلى آخر ؟ أم هي عوامل التطور الثقافي والاجتماعي المقترنة بالتطورات العمرانية ؟

اهتمامات اليوم تختلف اختلافاً كلياً عن اهتمامات الأمس

فما كان يعد شيء ضروري أصبح في أيامنا هذه كمالي ، و العكس صحيح
ما كان يعد من ضمن الكماليات نجده اليوم من الضروريات

أبسط مثال، في السابق
عند خطبة أي فتاة، كان يشترط توافر مؤهلات من نوع خاص حتى تكون من ضمن المرشحات
يشترط أن تكون علاقتها بالمطبخ علاقة وطيدة بينما لا يشترط أن تكون قد أتمت تحصيلها العلمي ..
ويفضل أن تكون ربة منزل أي غير موظفة حتى تهتم بالمنزل وتدير مسؤولياته

أما في وقتنا الحالي
فأول سؤال يسأله الشاب عندما يعلم بتوفر فتاة مرشحة للزواج: وين تشتغل وجم معاشها ؟ ..
يهتم بشكلها ، أناقتها .. طولها ووزنها ، كذلك مسماها الوظيفي وإن كان يفضل المعلمة وذلك لإجازتها الصيفية ومرتبها المرتفع بالاضافة إلى السبب الأهم .. محيطها المدرسي الأنثوي
لا يهتم بمعرفتها أصول الطبخ ولا حتى بأساسيات التدبير المنزلي


هذا كان مجرد مثال وليس موضوعنا الأساسي

..


الموضوع هو التالي
:


أفضّل قراءة رواية على قراءة وصفة إعداد طبق

أشجع تأمل الطبيعة بينما أرفض التسوق دونما هدف

أن أتعلم صياغة كلماتي بتعبير مؤثر أروع من تعلم طريقة أفضل لوضع المكياج

أقضي سهرة لطيفة محتضنة كتاب أجمل بكثير من احتضان الهاتف والحديث لمجرد الحديث

أرحّب بسبر أغوار عالم الانترنت على اقتحام عالم المطابخ

أحلم بكوني فارسة تمتطي حصان يركض دونما توقف وليس تاكسي جوال للتوصيل لكافة مناطق دولة الكويت

أفكر بمستقبلي الوظيفي والدراسي ، أما مستقبلي كمشروع أم وزوجة فهو غير وارد حالياً

أكره النفاق الاجتماعي والاستغلال العاطفي وأفضّل عليه مرافقة صديقة والحديث بذكريات الماضي الجميل

أستمتع بالجلوس أمام الحوض الرئيسي في الاكواريوم-المركز العلمي بينما أختنق بالجلوس في استقبالات النساء بكافة أنواعها


...

بعد قراءة ما سبق ، هل اقتنعتم بأنني أفكر بطريقة مختلفة
؟!



^^^^^^^^^^^^^^^^^^^^^^^^^^


الرائع/ أحمد الجميري ، حينما تغنى بـ "شعليّ أنا من الناس وشعلى الناس مني" .. أكاد أجزم بأنه كان يقصدني
:/

"كافّه .. شري"
لا أتدخل فيما لا يعنيني
ولا أفكر ، مجرد التفكير بخصوصيات الأخرين
وأراعي مشاعرهم قبل مشاعري في أغلب الأحيان


والنتيجة كانت


أسئلة لا تنتهي ، ولن تنتهي
حتى يفنى العمر وأكون تحت الأرض

تتطور وتتبدل مع تطور حياتك وتبدل أوضاعك



من ضمن الأسئلة الخربوطية والتي تأكلني معها على مر الأيام هي



أي كلية ناويه تدخلين ؟ بس حقوق صعبه .. ليش حقوق؟



وبعدها يكون سؤال التحطيم


متى ناويه تتخرجين ؟
ولي متى وإنتي مجابله هالكتب؟



ثم يتطور الوضع إلى

ما طلع اسمج مع المقبولين بالديوان؟
وين ناويه تشتغلين؟ وليش هالمكان بالذات؟




ثم السؤال العذاب

ماكو أخبار حلوه ؟


وتصل وقاحة بعضهم لدرجة السؤال

انتي مخطوبه وإلا مرتبطه ؟



وتتفاجأ بأن (عزوبيتك) مؤلمة للبعض ، حيث تراهم يختارون لك عريس الغفله دونما أي اهتمام أو عناية
لمجرد تأدية الغرض والسير على النهج المعتاد في التدليل على أي بنت عزباء أو
Single

لمجرد أنها كائن غريب عن هذا المجتمع
الذي ينبذ حرية اختيار اسلوب حياتك الاجتماعية
ولا يعترف إلا بالمتزوجين


أنت في الحقيقة لا تملك حق القرار واتخاذ ما يلزمك بشأن حياتك


فانت ملك
لأهل الديره
وخاضع لأقوالهم الفارغه
ولعقولهم الأفرغ
وأسير لعاداتهم وتقاليدهم التي أكل عليها الدهر وشرب






بإختصار

هذي الكويت ، صل على النبي
..
..
..

:/



^^^^^^^^^^^^^^^^^


منذ مده ليست بالقصيرة
أفكر بالهجره والرحيل

اكتشفت بأن سبب الصداع المزمن
وتقلب المزاج
وحالة البيات الصيفي/الشتوي
وقلة الانتاج
وصعوبة المكوث طويلاً بمكان واحد
إضافة إلى الحقد على الغالبية العظمى من "الحريم" اللاتي لا هم لهن سوى توفيق راسين "بصل" بالحلال
..

سبب ذلك كله

هو الهواء الكئيب الخانق المحبط
المحيط بي/بنا

..
..

I really need a FRESH AIR !

:S








كان هذا شوية تحلطم مكبوت
..
تجمع
وكبر
ليما صار
تحلطم مقروء


لحد يخترع
بس
ما قدرت أكبته فيني
وكنت محتاجه أطلعه اهني



ونتمنى أن يكون الأمن مستتب
وكلو تمام يا افندم
!

:/



 
posted by 78o8eYa at 8:05 PM | Permalink |


26 Comments:


  • At 2:33 AM, March 12, 2007, Blogger afyaa2

    فكير منطقي نوعا ما ..
    اصدقين ولهت ع مدونتج ..
    أكره النفاق الاجتماعي والاستغلال العاطفي وأفضّل عليه مرافقة صديقة والحديث بذكريات الماضي الجميل


    اما انج ما تفكرين بمشروع زوجه او ام فهذا التفكير الان من وجهة نظري لايجدي
    الان كل شي بوقته حلو

    اما ..


    أستمتع بالجلوس أمام الحوض الرئيسي في الاكواريوم-المركز العلمي بينما أختنق بالجلوس في استقبالات النساء بكافة أنواعها


    ...
    فهذا انا معاج 100%
    انصحج سوي بطاقة نادي الركسه في المركز العلمي الدخول مجاني يوميا لحوض الاكواريوم ..
    وناسه


    واخيرا هذي الكويت صل ع النبي ..(:

     
  • At 12:52 PM, March 12, 2007, Blogger Cr8ivia

    oh my God 7oqoqeya u r reading me!:S

    بالعكس تفكيرج مو غريب و لا فكرين غير الناس والله

    اكره التسوق لمجرد التسوق
    و اكره استقبالات النساء و تجمعاتهم تخنقني
    اعاني من لقافة خلق الله و الاسئله اللي مالها داعي من بداية التخرج من الثانويه
    الى اي كليه
    الى ليش السفر
    متى تخلصين و تردين
    ما انخطبتي؟
    مرتبطه؟
    وين بتوظفين؟
    شمعنه خاص مو حكومه؟
    انقبلتي؟
    قابلوج؟
    جم المعاش؟
    آآآآآآآه
    كل مانخلص من شي بدوا بشي ثاني

    المطبخ مالي فيه ابد ابد و افضل اي شي ثاني عليه حالي حالج
    و افضل قراءة كتاب على شسمه

    اشوة طلعت طبيعيه
    و لا تكبتين يما و لا تخشين بقلبج و الحقران ترا اجدى علاج لحالات مجتمعنا الميئوس منها :|

    love u!

     
  • At 2:06 PM, March 12, 2007, Blogger sologa-bologa

    فما أحسن كلامه.. إذا يخطر بالأسواق
    ترا أهل الحوانيت .. يلفتوله بالأعناق

    :)

    هذا صار تاق ثاني
    لكن أرجو عدم توهيق الآخرين
    :))

    لتجديد الهواء
    أنتم بحاجة إلى سفرة معتبرة

    الظاهر لأني ودي أسافر
    لتجديد الهواء
    قمت أعطي نصايح بالسفر
    :)

    الله يعينكم ويعينا على هذا الواقع

    ودمتم بود وحب

     
  • At 3:48 PM, March 12, 2007, Blogger Q8ya

    أشجع تأمل الطبيعة بينما أرفض التسوق دونما هدف

    والله صاجه...:)

    سالفه متى ناويه وليش هالكلية واشمعنا تشتغلين بهالمكان ؟؟؟

    انا اشتغلت والحين بدوا معاي بهالسؤال!!

    ماكو اخبار حلوه ؟؟ " على قولتج "

    وبعضهم يقولي عمرج 24 وليلحين في بيت اهلج @@

    يعني مثلا اروح حق الريال واطق باب بيته واقوله ابيك تخطبني ؟؟؟

    والله حاله @@

    يعطيج العافيه...:)

     
  • At 4:05 PM, March 12, 2007, Blogger 7osen

    اهنيك على طريقه تفكيرك المميزه

    رغم ان لدي تعليق على فقرة الطبق

    ارى ان من الافضل للبنت ان تكون علاقتها مع المطبخ

    علاقه جيده ،، فهذا الشيء اساسي للحياه القادمه وهو شي جميل جدا

    لا ينقص من قدر الشخص او الفتاه

    الطبخ فن جميل جدا وممتع جدا 0

    اما الناس الفضوليين فهم كثيرا جدا

    ودائما يتدخلون في حياة الاخرين

    سوا كنتي متزوجه او سنغل

    هذا الشيء لا ينتهي عند حد معين




    بوست جميل جدا

    بين لنا شخصيتك الجميله

    استمري على ما تقتنعين به ولا تلتفتي لأحد

    اتمنالج كل التوفيق

     
  • At 4:24 PM, March 12, 2007, Anonymous khaled

    :)
    القــدر يتحكــم بالأنسـان دائمـاً
    ويضعنـا فـي ظـروف مختلفة عـن التـي نـريد
    بالتــوفيـق لـج :)

     
  • At 10:13 PM, March 12, 2007, Anonymous pearl

    ما حسيت انج غير

    لاني مثلج

    سالفة الهجرة عشان نفتك من المجتمع الموبوء وطريقة التفكير الرجعية وايد كنت افكر فيها

    بس بعدين صارت عندي قناعة ان بالطقاق

    خليها تكون عندج انتي بعد

     
  • At 12:43 PM, March 14, 2007, Blogger ana_sokkarah

    فعلا شي يحير بس والله إني موغير عن الناس بهالوقت كلنا صرنا نتشابه
    أحس إن كلامج ينطبق علي ومن يومين جذيه ياني هالتفكير ليش آنا غير عن الناس إللي تفرح وتستانس ليش آنا غير ليش قمت أفضل الإنطواء والوحدانية على الإختلاط.. ليش قمت أفضل إني أقعد بالبيت على الطلعة والوناسة.. أشياء وايد محتارة فيها وشاللي غيرني لها؟؟

    ولاحظت هالشي بعد بكتاباتي صارت حزينه وكئيبة أحس انها تعكس احساسي لاشخصيتي

    عموما موضوع جدا روعة وناس وايد مثلج وانشاءالله سحابة وتعدي والفرح والسعادة والتغيير بالطريق إليك ان شاءالله

    تمنياتي لك بالتوفيق عزيزتي

     
  • At 1:16 PM, March 14, 2007, Blogger 78o8eYa

    afyaa2

    وآنا ولهت عليج أكثر
    منوره يا الغاليه
    :)

    نادي الركسه، امممم
    كان المفروض أسألهم اليوم عنه بس ما قدرت
    إن شاء الله بالزياره القادمه نسأل و نستفسر أكثر

    شكراً على المعلومه
    وعلى المرور الجميل
    لا تقاطعينا
    ^_^

    بحفظ الله


    -=-=-=-=-=-


    Cr8ivia

    Luv U 2 my dear
    &
    WeLcoMe ^_^

    الحمدالله طلعت طبيعيه
    وفي ناس وايد غيري تعاني من لقافة خلق الله اللي ما لهم شغل غير حياة غيرهم
    :S
    الحقران ؟ .. اممم
    في ناس على كثر ما تحقرينهم ، يحنون أكثر
    ما أدري بس ما صادفج أحد جذيه
    :/
    ..
    حياج حبيبتي

    وتنويه بسيط ، آنا المطبخ عندي
    مـــزاج
    !
    يعني المايه لي يت على المطبخ تلقيني أبدّع
    ولي ما اشتهيت
    ما أواطن اسمه
    ..
    وعندي آنا أدخل بروحي ، ولا أحد يحن على راسي ويغصبني
    :$


    -=-=-=-=-=-

    sologa-bologa

    حيا الله سلوقا
    :)

    لا هذا مو تاق
    :))
    لا تخاف ، محّد متوهق إن شاء الله
    ;P


    الله .. سفره
    ..
    الله كريم و يرزقنا سفره معتبره
    تغسل جبدنا

    ايه الله يعينا و يعينكم
    ويريّحك بالكم

    دمت بخير


    -=-=-=-=-=-=-

    Q8ya

    هلا وغلا
    :)
    ..

    اي روحي حق بيت الريال و كسري راسه بعد مو بس تطقين بابه
    وقولي له : متى ناوي تآخذني
    !!
    :/

    اهي بس حاله وحده
    قولي حالات

    الله يعين بس
    :S

    يعافيج حبيبتي

     
  • At 1:18 PM, March 14, 2007, Blogger barrak

    اختي العزيزه
    انتي بنعمه
    لانك تنظرين للامور بواقعيه
    واعتقد ان دراستك القانونيه
    زادت جرعات الواقعيه والنظره الثاقبه للامور
    دمتي متميزه

     
  • At 1:29 PM, March 14, 2007, Blogger 78o8eYa

    7osen

    أهلاً وسهلاً
    :)

    شكراً على الإطراء، دائماً
    تخجلون تواضعنا
    ..
    وبالنسبة للطبخ و المطبخ
    أوافقك الرأي بأنه شي مهم وجميل جداً
    ولكن يظل بالنسبة لنا
    مزاج
    !
    :$

    والمزاج هاليومين مو صوب المطبخ بالمره
    ..


    -=-=-=-=-=-=-

    khaled

    الحمدالله على السلامه
    :)

    صدقت
    كلام سليم
    %100


    -=-=-=-=-=-

    pearl

    حيا الله اللولو
    :)

    تبين الصج ؟
    عيزت و آنا أقول بالطقاق
    يعني تحقرين
    ما تحقرين
    ماكو فايده
    ..
    ودي بحل جذري
    بس للأسف
    شكله ماكو
    :S

    -=-=-=-=-=-=-

    ana_sokkarah

    نرحب بكم مجدداً
    ^_^

    صح ، وايد ناس حايشتهم هالحاله
    حسبي الله على اللي كان السبب
    ..
    :/

    الله يعين
    تسلمين عزيزتي
    والرائع تواصلج أكيد
    :)

    ربي يشرح صدرج
    ويفرج همج

     
  • At 1:34 PM, March 14, 2007, Blogger 78o8eYa

    barrak

    نشكر لكم مروركم
    وتشجيعكم


    صح دراستي لها دور
    دور كبير
    :/
    ودي أعلق أكثر
    بس أخاف أغرز بالحجي
    ..
    :$

     
  • At 7:27 PM, March 15, 2007, Anonymous Anonymous

    حتى أنا ودي أغير جو

    أول كنت أعصب لما يقولون عن مجتمعنا
    مجتمع مريض


    الحين صج صج صج أحس إنه مريض
    و يبيله مليون ألف علاج


    تصدقين حقوقية
    تفكيرج وايد يطابق تفكيري
    و لما حطيتي تفضيلج بأشياء عن أشياء ثانية
    مثل إنج تفضلين رواية على وصفة اعداد طبق

    كلهم أوافقج عليهم
    و كنت أقول لنفسي
    " مثلي "
    " إي صح"
    " أنا بعد"



    موفقة يا الغالية
    وين ما كنتي
    :)



    موكلت

     
  • At 2:57 AM, March 16, 2007, Blogger 3ateeja

    ما اقدر اقولج الا اني استمتعت بحديثج اكثر من كل مره ...
    بس الظاهر ان مجتمعج موبوووء سوري بس هذا اللي اكتشفته
    موبوووء بتوفيق راسين
    وعلى فكره ...دائما ما اسعى لتوفيق رراسين...ولكن بعيدا عن الطريقه المباشره التي تجرح الانثى ... وتحط من قدرها في عين نفسها
    مع الوقت الكل بيتقبل نمطج ....مع الوقت
    مسئله وقت فقط ...هذا اذا كنت مقتنعه فيها :)

     
  • At 3:03 AM, March 16, 2007, Blogger ReD Lady™

    tfkeerg 7da nice .. 3jbtnee 6re8t 6r7g ;)

     
  • At 3:10 AM, March 16, 2007, Blogger kuwaitia

    قوه حقوقيه اشلونج حبيبتى والله ولهت على مواضيعج وكتاباتج ومثل كل مره يبهرنى اسلوبج وطرقة تفكيرج

    :)) انتى ماشالله عليج كلج عقل ... هاذا الي اقدر اقولج اياه

     
  • At 3:41 PM, March 16, 2007, Blogger جنون إحساس

    على طول البوست لكني ما مليت وآنا أقرى
    أفكارج وكتاباتج تشابه إلى حد كبير أفكاري وأفكاري غيري الكثيرات من مرتادات عالم النت بالتخصيص,
    أشوف فكر مستقل راقي بشكل أو بآخر في
    بنات هذا الجيل خصيصاً
    وهذا ما يساهم في التبشير بجيل أكثر رقي
    وتفاهم, يعني الأسئلة اللي ذكرتيها من
    نظرة الناس ع البنت ليش تدور المشوار الصعب ومتى تشتغل ماصارت وهالتحقيق
    والمحاولات بتوفيج راسين بالحلال ترى كلها
    تنم عن عقول قاصرة مع احترامي
    لكل الأمهات والآباء
    .. يعني مو عن قصد منهم
    حرام, بس لضيق المعرفه
    بشنو نبي احنا عيال هالوقت

    وسامحينّا ع الإطالة
    :) قواج الله أختي وموفقة ان شالله بكل شي

     
  • At 3:47 PM, March 16, 2007, Blogger AuThoress

    حقوقية :

    محلاكْ ومحلى تفكيرك، انت في درب المجد والنور،كوني أنتِ ، امضِ كما تحبين وتشتهين، ستكونين أجمل حتما، كفي معك دوماً يا عزيزة

     
  • At 1:17 PM, March 17, 2007, Anonymous ENG-Q8iya

    الناس بالكويت ! و بالأخص الكويتيين

    صراع محدث بين الجدية و السطحية و للأسف هذا صراع يديد سببه الفراغة و عدم توافر أو عدم الرغبة بشغل العقل بشي مفيد


    كل شي تسوينه غلط ... و كل فكرة تفكرينها ما تعجبهم

    تبط جبدي كلمة: ترى إحنا بالكويت مو بأمريكا !!!! ليش أمريكا شنو فيها زود عنا بالله ؟

    ما عندهم غير إنهم يحترمون بعضهم و يحبون بعضهم

    وإحنا ماكو غير الحش و الطنازة اللانهائية

    ماكو غير القرقة الفاضية و التفرفر بالشوارع عمّال على بطّال

    و سلسلة الأسئلة و التشره طويلة ما تنتهي

    أول شي الثانوية:

    علمي ولا ادبي ؟ ليش و إشحقه ؟ ماحد يفهم إنه أكو شي إسمه ميول و هالشي ماله علاقة بالتفوق والكسل ! بعد مايصير الديرة كلها دكاترة و مهندسين

    وبعدين الجامعة:

    الكل يسوي روحه فيلسوف و عارف و فاهم بسوق العمل الكويتي إللي مايمشي إلا بدستور الواسطة ... و الكل يطب و يذم بجامعة الكويت و يحن و يزن على على الدراسة بالخارج ... و لو إتنشين وراهم إتلاقينهم ما فلحوا بجامعة الكويت و مطرودين منها بسبب قوانينها الصارمة ... آنا ما أمدح جامعة الكويت لكن إللي يبي يتعلم و يطوّر من نفسه ما يحط عذره و علثته بالنظام التعليمي ّ كانّا تخرجنا و الحمدلله ناجحين بعملنا ! و بعدين أبوي مو قاعد على بنك عشان يطرشني آنا و إخواني ندرس بره الكويت

    خلصنا من الجامعة و يينا حق الشغل:

    ليش ما رحتي مني و روحي مناك .. و ليش قطاع خاص و أووولله شييوديييج كل يوم الصبح إهنااااك ... و ليش معذبه نفسج بهالكرف ؟ و شالله حاادج و إنتي مينونة ...الخ

    الزواج:

    جم عمرج ؟؟ ما يوولج خطّاب !! أصيل مو أصيل ...

    ويع ويع ويع

    والله عيب هالسوالف, ترى كلنا أوادم و اللي ما عنده أخلاق, أصله إشبفيده فيه ؟

    تزوجنا:

    هاا ماكو اخبار حلوه ؟
    ما حملتي ؟!!!!!

    و توصل وقاحة بعضهن إلى السؤال عن اسباب تأخر الحمل !!!؟
    يعني بالله آنا و زوجي عندنا ظروف مايصير ؟
    ولا يعني الواحد يتزوج بس عشان يفرّخ و يكوّدله كوكش يهال ؟

    ترى مفهوم الأسرة ما يتضمن أطفال ! الزوج و الزوجة بحد ذاتهم أسرة و عايلة !

    صار عندج ياهل:

    حنة و رنة .. ييبيله أخت .. ييبيبله أخو

    صار عنده أخو:

    بس 2 ؟ مو حلو جذي ... ما عندكم سالفة .. بيتكم صخة ...


    يعني ما أدري شالمطلوب ؟ أييب عدد متواضع من الأطفال اربيهم عدل و لاّ أييبلي جيش و أقطهم الشارع يربييهم ؟؟

    وبعدين من على حسابه آنا بيييب كل هذيله ؟
    المعيشة بالكويت كل ماله وتصعب أكثر و أكثر


    وووووووو .... ما نخلص من الحجي و القرقة

    و المشكله مو دايمن تقدرين تقولين طاف و بالطقاق ... لأنه للأسف الكلام بعض المرات إيي من صوب الأهل ؟؟؟ يعني شلون يصير بالطقاق ؟؟
    و شلون بنسكّر أذانيينا عن الكلام الزايد !


    بالكويت سويت الزين ولاّ الشين ... كله نفس الشي .. دايما إنت الغلط .. كل الغلط


    لأ هاذي مو الكويت و صل على النبي ! الكويت وايد احسن من جذي و أرقى و أكبر بس للأسف هاذي نتيجة تراكمات سخيفة و تقليد أعمى و تفاهات و فراغ الرؤوس و غياب الوعي الإجتماعي .... نتيجة كل هذا و أكثر ... صار مجتمعنا موبوء بأمراض إجتماعية ميؤوس من علاجها ! فقط لعدم الرغبة بالعلاج

    ENG-Q8iya

     
  • At 7:05 PM, March 17, 2007, Blogger 78o8eYa

    CHoko

    هلا وغلا
    عساني ما أفقدج من شر
    :*

    للأسف ، انه مريض
    وأعتقد بيدنا احنا إنا نعالجه

    نربي عيالنا على نبذ هالأمراض المتفشية
    والتطعيم ضدها

    عدل ، احنا نتشابه
    توج تكتشفين؟
    ;p

    ربي يشرح صدرج ويسر أمرج
    ويسهل عليج كل صعب

    قولي آمين
    :)

    تسلمين لي حياتي
    ^_^

     
  • At 7:14 PM, March 17, 2007, Blogger 78o8eYa

    3ateeja

    حيا الله عتوجه
    ^_^

    كلامج عدل
    وعجبني تعبير

    "دائما ما اسعى لتوفيق رراسين...ولكن بعيدا عن الطريقه المباشره التي تجرح الانثى ... وتحط من قدرها في عين نفسها"

    انتي بهالجمله حطيتي ايدج على الجرح
    :S
    ..
    جان زين اللي في بالي تآخذ كورس عندج
    :/

    مسألة وقت ، ما أدري شكثر بيطول بس الله يعيني ويمر هالوقت بسرعه و يفهمون

    ودي أقولج، إني أقرا لج واستمتع بسوالفج بس ما أدري ليش كله يايه متأخره وأحس كلامي ماله داعي
    :$
    إن شاء الله أحجز بالسطره الأولى
    وأرز تعليقي أول شي
    ;)
    موفقه عزيزتي

     
  • At 7:40 PM, March 17, 2007, Blogger 78o8eYa

    ReD Lady™

    Welcome :)
    &
    thanx my dear


    -=-=-=-=-

    kuwaitia

    أهلين وسهلين بـ كويتيه
    ^_^
    يقويج يا الغاليه ، آنا الحمدالله تمام
    بشرينا عنج؟
    ليش منخشه هاا
    انتي غاليه بدون هالتغلي
    ..
    دايماً تحرجيني
    :$

    تسلمين ما تقصرين
    وتوله عليج العافيه
    والجنه الدافيه
    :)

    -=-=-=-=-=-

    جنون إحساس

    حياج الله ، سعيده بتعقيبج
    وشاكره لج إطرائج
    وأكيد مامن إطالة

    حياج الله مره ثانيه ، لا تقاطعينا
    ربي يقويج
    ويوفق الجميع إن شاء الله
    :)

     
  • At 8:00 PM, March 17, 2007, Blogger 78o8eYa

    AuThoress

    ان كان للدرب معين
    وللنور ضياء
    وللأمل بسمه

    بلاشك ستكون
    هي كلماتك

    كالشمس تطلين من بين الغيوم

    كم أفرح بـ طلاتكِ

    دمتِ قريبة
    وعزيزة
    :)

    -=-=-=-=-=-

    My EnGi

    أبدعتِ
    ..
    انتظاري الذي امتد لأسبوع تقريباً لم يكن بلا جدوى

    فـ شكراً

    لمشاركتنا الهموم
    ..

    يا وخيتي
    لا تنسينا من الجو العليل اللي بتشمينه
    عاد تنقصي لنا
    بـ شمّه
    ;p


    ووو
    لا يعصب
    Keep it Cool ! ;)
    & enjoy ^_*

     
  • At 7:19 PM, March 20, 2007, Blogger Engineeroo

    This comment has been removed by the author.

     
  • At 11:14 PM, March 20, 2007, Blogger Alather

    من الحنة عالزواج
    تحسين نفسج عيزتي وانتي توج صغيرة

    .
    .

    بالنسبة
    .
    .
    أذكر ام رفيجة اختي
    تسأل اختي الصغيرة .. اثير انخطبت؟
    جان ترد عليها اختي: قصدج متزوجة.. لا مو متزوجة


    لكن الأسئلة الملقوفية الحمدلله ما اعاني منها

    .
    .

    اعاني من حالة لا اعرف لها تشخيص

    مزاجية بالاجتماعات

    احد الاجتماات او الزيارات تلقيني اضحك واسولف واعرف السنع وابادر وحالة


    واحد الاجتماعات تلقيني انا وين والسنع والشيل والحط وين
    !
    !
    حتى لو اشيل واحط .. تلقيني مثل الهنود بس اهز الراس

    .
    .
    احس من زمااان ما سيرت عليج
    ولهت عليج
    :)

     
  • At 12:03 PM, March 23, 2007, Blogger 78o8eYa

    alather

    اشتقنا
    ..
    :)


    اي والله أسئلة ملقوفبة ، هالناس ما تقدر تعيش بدون ما تسأل
    والمشكله إنج لي سألتيهم ، يحقرونج و يضيعون السالفه
    !
    :/


    حالة المزاجيه ، هذي شي طبيعي جداً

    احنا مثل البحر ، مره مد ومره جزر

    وتعتمد المايه بعد على الجو المحيط
    يعني في ناس ترتاحين معاهم و تآخذين وتعطين

    وفي ناس تعدين الثواني عد
    عشان تقومين


    ضحكتني كلمة
    "تلقيني مثل الهنود بس أهز الراس"
    ;Pp~ LOL

    لاتقاطعينا يا الغاليه
    ^_^

    ا