Saturday, January 27, 2007
عريس الغفله ;Pp~


مثل ما وعدتكم
..
اليوم بقول لكم
عن
عريس الغفله
...
...
وأتمنى تضحكون على السالفه ، نفس ما ضحكت عليها
^_^
********
كان يا ما كان
...
....
........
.............

الوالد بحكم طبيعة شغله و سفراته عنده ربع وايد من جنسيات مختلفة ، ومن ضمن صداقاته ، صديق من الجنسية المصرية ، عشرة عمر ..

من قبل لا الوالد يتزوج – أمي طبعاً ، يعرف هالصديق .. يعني يعرف أبوي من أيام العزوبية و ليما صارو عياله حريم و رياييل

هالصديق وللأمانة ، آنا أشك إنه مصري ! .. مع احترامي لأخوانا المصريين لكن هالشخص ما فيه من ريحة المصريين غير جوازه ! .. أهو مواليد الكويت ، أصله من الأسكندرية .. والاسكندريه أجدع ناس ! :)
زوجته بنت خاله ، و عندهم ثلاث كتاكيت الله يخليهم لهم .. طبعاً العيال مواليد الكويت بعد

هالصديق مثل ما قلت من قبل عشرة عمر مع الوالد

فـ علاقتنا معاه حيييل حيييل قريبه
بمثابة واحد من العايله ،
دايماً نقول له : بنعطيك الجنسية الكويتية يا بو أحمد ، اللي خذوها مو أحسن منك
^_^

وزوجته حياويه .. لدرجة إنك لما تسلم عليها ، ايدها ترجف من الحيا !! .. أي صدقوني و الله ترجف من كثر الحيا
ترا زوجته مصريه بعد .. أخاف نسيتو

المهم ، زوجته أصغر من أمي ، يعني مو بسنها بس متأقلمين وايد مع بعض ، جنهم من جيل واحد

وبحكم علاقتهم القريبه معانا ، عندهم خبره لا بآس فيها بعاداتنا وطبايعنا كـ كويتيين

...

لما قررت الوالده من سنتين تقريباً تدخل دار القرآن ، اقترحت على زوجة صديق أبوي (أم أحمد) إنها تسجل معاها عشان يصيرون مع بعض

وفعلاً سجلو مع بعض وداومو ، و يحليلهم كانو شطار و شادين حيلهم بين تسميع و تجويد و امتحانات

ومن دار القرآن تعرفو على صديقات ، كويتيات و سوريات و مصريات


كنت دايماً أسمع عن صداقاتهم و سوالفهم ، كانت هالعلاقات ببعض تتقرب أكثر من مجرد زميلات دراسة إلى صديقات

وفي يوم من الأيام ، اتصلت أم أحمد على موبايلي تعزمني على يمعه ودرس ديني بنفس الوقت يجمع أكثر من صديقة من دار القرآن و طبعاً من ضمنهم أمي .. ليش داقه علي و ما اكتفت إن أمي تقولي ؟ .. عشان تتأكد إني راح أييها في شقتها وما راح أتعذر
وفعلاً رحت مع أمي شقة أم أحمد ، و كانت يمعه حلوه .. مع إنهم كلهم أكبر مني و ما فيهم كويتيات غيري آنا و أمي لكن استفدنا حييل من الدرس ، و استانسنا باليمعه

بعد ما مشو الغالبية و بقينا آنا و أمي و صديقتين مصريتين ، هاء و ميم ، وأم أحمد طبعاً صاحبة الشقة

انفتح موضوع ثاني ماله علاقه باليمعه كلش
..

الموضوع بكل بساطه إن هاء معجبه فيني حييييل ، وإهي أول مره تشوف كويتيه جذيه .. و انجبرت فيني المره لدرجة إنها تبي تزوجني واحد مصري يبي وحده كويتيه بالذات وإهي قاعده تدّور له !!!

آنا طبعاً مواقف جذيه أبطها ضحكه ، وأمي تتبوسم وودها تكفخ هاء !

وآنا أضحك أقول لها: مصري عاد يا هاء .. ليش ليش ؟ آنا شنو مسوية لج ؟ .. ما مداني أسوي لج شي ، توني متعرفه عليج ، إنتي حاقده علي .. قوليها لا تستحين بس عاد لا تقولين لي عندي عريس مصري إنما إيه ؟!

أم أحمد ويها قام يعطي ألوان ، مسكينه صج كسرت خاطري ، يعني انتو في بيتي شلون أحطكم بهالموقف البايخ
!

وهاء رايحه تشرح لي مزايا الشاب الحليوه المصري : هوا عايش بأمريكا ، وعندو الجنسية الأمريكية ، أصلو دكتوور .. وعندو 36 سنه بس !
أمووور !!! .. ما تخافيش يا بنتي آنا حجوزك لواحد مش أي كلام .. سدئيني هوا حابب يتجوز من كووييتييه !
وآنا لما شفتك عجبتيني !!

آنا مازلت أضحك : وأُلتي .. هيااا دي !! ومفيش غيرها حد !

اهني تتدخل امي بالسالفه :

حبيبتي هاء انتو لكم عادات و تقاليد و احنا بعد عاداتنا و تقاليدنا غير عنكم ، احنا بناتنا ما يطلعون بره .. أًصلاً عيب يطلعون بره ، ألحين احنا الكويتي و ما نعطي أي واحد ، وانتي تقولين لي مصري !
وبعدين إهيا كلها بنت وحده ، يآخذها ويروح فيها بقلعة وادرين ليش ؟؟
يمكن إنتو تهمكم الجنسية و العيشه بره ، احنا ما تهمنا هالسوالف .. احنا نشتري ريال .. اخذوهم فقاره و يغنيهم الله
وما على الجنسية الكويتية ، يقولون حلاة الثوب رقعته منه و فيه


وقامت تشرح لها شنو معناة هالمثل ، و آنا أضحك و أطالع أم أحمد اللي ويهها صار احمرررر

وترقع السالفه تسأل: هاء انتي أكيد كنتي بتهزري ، مش أصدك هااه ؟!! ..

وترد عليها : لا أنا بتكلم جد واللهِ يا أم أحمد ، هوا شاب كويس جداً ، يا حقوقيه اسمعي كلامي ومش حتندمي .. سيبك من كلام ماما !!!!!!

ماما مش حتنفعك !!!


يا قويه إنتي يا قويه ..


اهني الوالده جان تطب فيهم : بالله ما تقولين لي هالمصري شفيه ما يآخذ له وحده مصريه و يفكنا ؟
شمعنا يبي كويتيه إلا إذا اهو حاط عينه على حلالها و جنسيتها ؟ .. وبعدين أهو مو على قولتج شاب كويس جداً ، ليش توه يفكر يتزوج ؟
مو عايش طول عمره بأمريكا يعني ما عليه قاصر ، شعلامه توه يفكر يعرّس ؟
إلا جان عنده خرابيط وتوه ركد ؟؟

أم أحمد تهدي الوضع : أصل هيا مش عارفه إن انتو ما بتتجوزوش غير كيويتي ، افتركت إن انتو زيّنا ، لأ يا هاء .. هما الكوايته ليهم برستيج خاص للجواز مش زينا ، ما تحاوليش

ميم تنطق وأخيراًُ وتقول : بس آنا شايفه إنو الشاب كويس ، ما فيهاش حاجه يعني ؟! .. ليه متشددين أوي كده ؟؟

آنا أقول بقلبي : كان سكوتج أرحم يا ميم ، الله يصبرني على هالسالفه

وانقل نظراتي بين أمي و هاء و أم أحمد المسكينه

وطبعاً كل وحده مقتنعه إنها صح و تحاول تقنع الثانيه وماكو فايده

يتناقشون بمسألة زواج الكويتية من غير كويتي ، و شنو يترتب عليه من حقوق وإلتزامات .. و تأُثيره على العيال
اللي يتبعون أبوهم .. وتشتت أمهم ما بين أهلها و ريلها

انتهت السالفه إن الماما رافضه هالزواج لأنها ما تبي تغرّب بنتها ، و هاء تحاول فيني .. : أصل العيشه بأمريكا أحسن من هنا بكتيييير ، انتي روحتي أمريكا ؟

أرد عليها وآنا واصله حدي : ما رحت وما أبي أروح ، ربي يخلي لنا ديرتنا و يحفظها .. لو تلفين العالم كله ما تحصلين مثل الكويت

بعد مناقشات حاده ، انتهت بصعوبة

نودّع أم أحمد وهاء وميم

ونرد البيت

هالسالفه كانت من قبل سنه تقريباً

ضحكنا على السالفه حزتها و نسيناها


بس صار شي فتح هالسالفه مره ثانيه
..

ما راح نخلص
:/

...


الاسبوع اللي فات أم أحمد تتصل ، تبي تزور الوالده و معاها هاء ووحده من بنات دار القرآن ، عشان يسلمون عليها بعد رجعتها من الحج

أم أحمد زارتنا بعد يومين من ردتنا ، يعني هالزيارة حق هاء والصديقة الثانية

الوالده تقول لي إن أم أحمد بتسيّر علينا بس ، و قبل موعدها بساعه .. وتطلب مني أكون معاها

أوكي ، مو مشكله

طبعاً أول وآخر مره شفت فيها هاء كانت ذيج المره ، من مدة سنة تقريباً
والصديقة الثانية ما أعرفها

..

نزلت سلمت عليهم وقعدو يسولفون
شوي وإلا
هاء تسألني

انتي حجّه سبورت خالص ، أيه الجمال ده ، بسم الله ماشاء الله .. انتي خاسّه صح ؟ ..

بكل براءة أجاوبها : أي عقب الحج وايد ضعفانه ، أحسن جذيه

ايوا يا ستي عشان تبئي عروسه زي الأمر .. هوا انتي فكرتي بالعريس اللي كلمتك عنو ؟ .. ما تبصيش لماما آنا بسألك ، خليكي من ماما .. ما أنا أُلتلك ماما مش حتنفعك !!

آنا اهني ودي أهفها بأكبر شي عندي .. بس المشكله الطاولة اللي حطيت عيني عليها ما أقدر أشيلها بروحي

أبتسم لها وأرد : تصدقين ما فكرت.. لأني مو حاطه في بالي أصوم أصوم وأفطر على بصله ! .. آنا أشجع المحلي ، مو سامعه بحملة : الكويتي أنفع ؟!

الوالده تتدخل : ليما ألحين يا هاء .. من ذيج المره وليما ألحين ما نسيتي ؟!

هاء تضحك : واللهِ آنا عاجباني البنت من المره اللي فاتت ، ونفسي أفرح بيها ، زي الأمر ما شاء الله ، و الشاب كويس جداً
وتلتفت علي : أصلو RICH أوي !!!

وتعفس ويها وتسويلي حركه بإيدها : وموش عايزيين فلوس الكوويييت !!!


أمي ترد : آنا قلت لج من قبل ، احنا نشتري ريال و ما همنا غني وإلا فقير حق عمره ، و بنتنا ما عليها قاصر والحمدالله ، يوم إنه ما يبي فلوس الكويت شحقه بعد يبي من بنات الكويت ؟

إن شاء الله ربي يرزقه بنت أحسن من حقوقيه .. وتفرحون بالشاب الكويس جداً ، بعيد عن بنتي


ماهو ما فيش أحسن من كده ! ..


هاء تدرين شنو يعني بنتنا مو للبيع !!

ورجاءاً هالموضع انسيه ولا تبطلينه مره ثانيه
خلاص ما أبي أسمعه منج مره ثانيه


......


الوالد لما درا بالسالفه كان رده حاسم : هالمره مالها شغل ببنتي ، ولا يكون تشوفها مره ثانيه !
خلصو الرياييل بالديره عشان أعطي بنتي حق واحد مصري و عايش بأمريكا بعد ، ما أدري شيطلع وشمسوي بدنيته


...
....
......
.........
............


آنا عن نفسي ضحكت وايد على السالفه- التحفه الأوريجينال

صج لي قالو : لزقة عنزروت .. ويه منجب
!



ممكن تزودونا بآراكم بالموضوع الشيق

:
:
:
:

هل تؤيد أم تعارض زواج الكويتية من جنسية أخرى ؟؟
مع ابداء التعليل
شاكرين لكم حسن تعاونكم معنا
***************
راح أغيب لمدة اسبوع ، على أمل العودة والتعقيب على تعليقاتكم و آرائكم
....
....
وليما ذاك الوقت
.....
أستودعكم الله الذي لا تضيع ودائعه
:)
 
posted by 78o8eYa at 10:08 PM | Permalink |


16 Comments:


  • At 10:23 PM, January 27, 2007, Blogger rewrwer

    Hello! You have a very nice blog! I'm here to share valuable info with you visit my blog,about Mozilla Firefox web browser.

     
  • At 12:01 AM, January 28, 2007, Blogger moklet-choka

    لووووول

    يا حليلج يا حقوقية

    و الله بطت جبدي يوم قالت
    " ماما مش حتنفعك "


    أنا انقهرت
    !!
    @@




    بالنسبة للسؤال

    الزاوج من كويتي / اماراتي / مصري / هندي / ألماني / بكستاني



    مو مهم
    المهم التوافق



    يعني إذا بنت كويتية تقدر تتوافق
    مع غير الكويتي
    و الغير كويتي هذا فعلاً فعلاً انسان جيد

    ليش لأ ؟


    حتى الكويتي اللي بتزوج من غير كويتية
    إذا داشة خاطرة

    كيفه


    ليش التقييد و الانغلاق ؟




    أنا عن نفسي أقول
    حلات الثوب رقعته منه و فيه

    لكن إذا الواحد بحط له رقعة ثانية لأن الرقعة عاجبته


    مو سالفة خطيرة
    ولا
    أمبيـــه

    بالعكس عااااادي
    و تلاقيني أول من يفرح لهم
    و يتحلى عليهم
    :)



    و تردين لنا بالسلامة إن شاء الله
    :)

     
  • At 2:16 AM, January 28, 2007, Blogger PearL

    آنا اهني ودي أهفها بأكبر شي عندي .. بس المشكله الطاولة اللي حطيت عيني عليها ما أقدر أشيلها بروحي


    لووول

    ضحكتيني يا حقوقية
    المرا حاطتج ببالها
    :):))))

    ======================
    بالنسبة للتأييد او المعارضة
    اكيد معارضة

    اي جنسية ثانية اكيد عاداتهم وتقاليدهم وتفكيرهم غير عنا

    وحلاة الثوب رقعته منه فيه

     
  • At 12:37 PM, January 28, 2007, Blogger 7osen

    حقوقيه

    والله ضحكتيني

    احلى شي بالموضوع تعليقاتج

    بس شفيها هذي

    يعني لازم انتي ،، مافي غيرج



    اما موضوع الزواج

    اعتقد عادي ما فيها شي الزواج من جنسيات مختلفه

    نفس ما قالت الاخت
    moklet-choka

    اهم شي التوافق

    لكن الافضل طبعا ،، من نفس الجنسيه
    يعني الكويتي انفع مثل ما قلتي


    اقول
    تبين احد يشيل معاج الطاوله
    حاظر

    :))

     
  • At 6:04 PM, January 29, 2007, Blogger Q8ya

    مثل ما قالت الاخت

    moklet-choka

    تعليقها اختصر اللي بقوله .... بس طبعا الاولوية للكويتي على قولتج الكويتي انفع...^___*


    تروحين وترجعين بالسلامه

    have fun..;>

     
  • At 10:58 PM, January 29, 2007, Blogger Alather

    سوري عالقطاعة
    وعدنا لكم لنرى .. ماذا نرى
    لوول

    الله يعينج .. أكره هالمواقف

    بس عجبتيني لما رديتي عليها
    أصوم أصوم والكويتي انفع
    ادييها بالويه

    :))


    بالنسبة للسؤال :
    شخصيا لا لاني ماقدر اتأقلم
    يا ربي ديرتي ماعرف شنو
    الله يخليها لنا

    لكن بشكل عام .. لو كويتية تاخذ خليجي مافيها شي
    من نفس العادات ونفس التقاليد ومانا بعاد عن بعض

    لكن غير هالدول .. أرفض




    تروحين وتردين بالسلامة

     
  • At 9:29 PM, January 30, 2007, Blogger sologa-bologa

    يا ختشي يا ختشي
    عليها عروستنا ربنا يحرسها

    :)

    بعد الزواج زواج
    مثل ما الريال يتزوج غير كويتية
    من حق الكويتية تتزوج غير كويتي
    بس أحسن لها
    انها تعيش برا الكويت لسبب بسيط

    إن القانون الكويتي
    ما يعطي الكويتية حقوقها الاجتماعية
    والقانونية والسكنية
    اذا تزوجت من غير كويتي

    حتى عيالها ينحرمون من الجنسية

    على فكرة
    هذا مخالف للدستور
    اللي يقول

    الناس سواسية في الحقوق والواجبات
    لاتمييز بينهم بسبب الجنس أو الأصل أو الدين

    هذا الدستور يقول جذي

    وأقول كمان

    يا ختشي خطبوها خطبوها

    ونتمنى لكم عودا محمودا

    ودمتم

     
  • At 5:42 PM, January 31, 2007, Blogger Cr8ivia

    مت ضحكككك عليج و على الوالدة ههههههه اش هالدعللللللله


    حلاة الثوب رقعته منه و فيه

    الثقافات مختلفة و المذاهب و الطبايع و العادات
    تسبب تشتت لليهال

    حتى لو كان في حب .. الحب مو دايم .. الحياة و ظروفها اقوى منه ..

    و حتى لو ما حصل اتفاق و تم الطلاق مصيبه اعظم من الطلاق كون الاب او الام بمكان و عيالهم بمكان ثاني

    و يبقى النصيب و التوفيج من رب العالمين بس احنا ناخذ بالاسباب

     
  • At 8:34 PM, January 31, 2007, Blogger Saakhir

    عجييييييبة المصرية

    الزواج مو غصب، يعني ما فقدت الأمل وقعدت تحاول وتحاول

    ومحاولاتها تدل على شيء من الاثنين:
    إما أن من وراء هذا الزواج مصلحة، مثل ما ذكرتي
    أو أنج آية من آيات الحسن والجمال
    وأنا أرجح الثانية
    :)

    الله يوفقج

     
  • At 8:16 PM, February 02, 2007, Blogger Nescafé

    ياااربي على هاللزقه
    صج ويها منجب

    بالنسبه لي فـ انا مع اللي يقول الثوب رقعته منه وفيه.. في رايي ان الزواج من بره صعب
    اذا ريال قاعده تترتب عليه مشاكل بعد مايتزوج من بره فـ مابالج بالبنت

    لا ومصري بعد ;P
    يعني من الخليج وايد اهون، بس هم الكويتي انفع

     
  • At 2:36 PM, February 03, 2007, Blogger barrak

    انا اعارض
    وتردين لنا سالمه

     
  • At 12:05 AM, February 05, 2007, Blogger afyaa2

    >>>اولا ..
    قصه مضحكه مبكيه بنفس الوقت ..

    ثانيا ..
    أأيد وما أأيد ع حسب الحاله ..
    كل واحده ماخذه نصيبها ..
    سواء من جنسيتها اولاء

    وربي يرزقج ولد الحلال اللي تستاهلينه ويستاهلج

     
  • At 7:20 AM, February 05, 2007, Blogger 3ateeja

    كويتي و كويتيه ويالله نلحق راس
    هالدور من برااا...لاصعبه شوي
    بس والله لو اهلي يرضون اتزوج مو كويتي جان انا اول وحده لكن المجتمع ما يحبذ هالشي ...بس شرط اني اعيش بديرتي ...
    بس كل شي بصوب ويوم تقولين لها افطر على بصله بصوب
    ههههههههههههه بدعتي
    بس ترى يمكن مثل ماقالت يطلع كويس
    ورييييييج لول
    بس انتي شرايج

     
  • At 1:34 AM, February 06, 2007, Blogger amal

    حقوقية,,,

    لن استطيع الأجابة عن سؤال عام,,كهذا,,,
    لأن كل حالة ولها مواصفاتها,,,

    بس ودي أنبهكم,,,
    لشيء,,,

    لا تضحكون وايد على الموقف,,,
    باجر تشوفين الولد,,,
    تنجبرين فيه,,
    وينربط لسانك,,,

    مارة علي وايد حالات ,,
    يستنكرون ويتنطنزون,,,
    وأخر شيء تقع في غرامه,,,
    وتتزوجه
    ؛)

    والله يردك بالسلامة يا عروسة
    :)

     
  • At 4:04 PM, February 06, 2007, Blogger 78o8eYa

    rewrwer

    thanx .. i'll be Glad to visit :)

    =-=-=-=-=

    moklet-choka

    PearL

    7osen

    Q8ya

    Alather

    sologa-bologa

    Cr8ivia

    Saakhir

    Nescafé

    barrak

    afyaa2

    3ateeja

    amal


    شاكره جداً لتفاعلكم مع الموضوع ، وإبداء آرائكم

    وربي يسلمكم من كل شر

    آنا رديت بالسلامه
    ^_^


    ..
    ..

    محّد عروسه ! .. وباقين في حياة العزوبيه

    لاحقين على الشقا
    ;pP~

     
  • At 10:11 PM, February 24, 2007, Blogger sar7an

    هالمره مالها شغل ببنتي ، ولا يكون تشوفها مره ثانيه !
    خلصو الرياييل بالديره عشان أعطي بنتي حق واحد مصري و عايش بأمريكا بعد ، ما أدري شيطلع وشمسوي بدنيت


    أنا أقول ان البطل في القصة اهو ابوج..بصراحة يبرد القلب.

    و بالنسبة حق زواج الكويتية من جنسية اخرى
    رايي فيه انه الواحد يسمع كلام مجرب او على الاقل واحد عنده خبره..يعني انتي قلتي انه ابوج يعرف المصري صديقه من زمااان و من قبل لا يتزوج. و علاقته مع المصري وايد قوية و قريبة, و مع هذا شوفي شلون كان رده عالموضوع..يعني الشغلة واضحة و ما يبيلها تفكير..

    على فكرة أنا أشوف ان في شعوب و مجتمعات بعاداتها و تقاليدها المختلفة ان فيهم شباب وايد أحسن من شباب الكويت. لأن شباب الكويت للأسف وايد منهم قاعدين يطلعون من خط العادات والتقاليد..