Wednesday, November 29, 2006
بين دفتي كتاب

متعتي التجول بين الكتب

أنسى نفسي .. و أنسى الوقت

كالمدمنة أتصفح الكتب غافلة عن الجميع

هذا حالي في المكتبة

كيف بـ معرض الكتاب

؟

أينما ترحل ببصرك تجد الكتب تنتظرك بشغف

كي تحتويها بين يديك ، و تكشف خباياها

.

.

.

أعتب على القائمين على المعرض بضعف الاعلان عنه

وكأنه مرض معدي نخاف الإعلان عنه

بضع إعلانات متفرقة في بعض الجرائد اليومية

واعلان سخيف مصور تم عرضه بتلفزيون الكويت

..

شي يفشل الصراحه يكسر القلب

-=-=-=-=-

زرت المعرض على مدى 4 أيام ، حتى اكتملت المجموعة - الكنز

حاولت التقيد قدر الإمكان بما درجته ضمن المطلوب

ولكن جاذبية الكتب انتصرت فكانت أقوى مني

كانت عملية البحث والشراء كالتالي

في اليوم الأول كنت مصطحبة أخي الصغير ، وبما أن لي دور نشر معينة أعتدت شراء كتبي منها

فكانت الجولة سريعة

والنتيجة مرضية بالنسبة لليوم الأول

:)

آخر شيوخ الهيبة لـ محمد عبدالقادر الجاسم

هو جمع لمقالات سبق كتابتها في الموقع الشخصي الخاص بالكاتب

وكاد الكتاب أن يمنع و لكن تم الإفراج عنه في اللحظات الأخيرة

خلف أسوار العلم لكل من م.عبدالوهاب السيد و م.سند راشد دخيل

أول موسوعة عربية متخصصة في علوم ما وراء الطبيعة ، كنت أبحث عنها

وهذه الطبعة الثانية لنفاذها من الأسواق

يوميات نائب بالأرياف لـ توفيق الحكيم

هي مذكرات الكاتب ، تم شراؤها بناءاً على نصيحة غالية من الدكتور

عبدالرسول عبدالرضا بهبهاني ، أستاذي الكريم أثناء فترة الدراسة

بحثت عن الكتاب مطولاً .. و أخيراً حصلت عليه

:)

شهوة الأجنحة لـ غادة السمان و الطين لـ عبده خال

روايتان تم شراؤهما بناءاً على نصيحة من

7osen

غرفة السماء لـ ميس خالد العثمان

تم قراءتها، و يشرفني إلتقاء الكاتبة شخصياً و الحصول على إهداء من قبلها

ودودة ميس بشكل خيالي ، حبيتها

و ناقشتها بالرواية وأحداثها، ابتسمَت عندما أبلغتها عن بكائي لموت البطل

;Pp~

بإختصار .. رواية تعيشها بكل تفاصيلها

تستحق القراءة

سعار - عروس المطر لـ بثينة العيسى

كنت متلهفة جداً لقراءة الرواية الحائزة على جائزة الدولة التشجيعية

وبقدر لهفتي كانت سعادتي بالإطلاع على هذا الزخم اللغوي والتعبيري

رواية سعار أعادت لي بعضاً من حياتي المفقودة حيث كنت أسترجع بعض المواقف المدفونة في بئر الذاكرة أثناء قراءة تعبير معين أو موقف مرت فيه بطلة الرواية

أما رواية عروس المطر فتنتظر دورها للقراءة ، و لا أعتقد بأنها تقل روعة عن سابقتها

صمت الفراشات لـ ليلى العثمان

أعلم جيداً جرأة الكاتبة وتخطيها للخطوط الحمراء

ولكن لا يمكنني تجاهل إصدارها الحديث والذي كان من المفترض أن يبصر النور من مدة ليست بالقصيرة

وقد تم الإفراج عنه .. كيف أتجاهلها . العنوان ملفت

المحتوى ، لا تعليق ! .. كلمة حق يجب أن تُقال

في نهاية الرواية حقدت على الكاتبة

!!

:/

في اليوم الثاني

اصطحبتني أو اصطحبتها لا فرق ، المهم أننا كنا معاً

ENG-Q8iya

^_^

وكانت الحصيلة كالتالي

:

رائحة البحر لـ طالب الرفاعي

بعد إلحاح من المصري الذي ما فتأ بمناداتي بالأستاذة حتى كرهت اللقب .. في المكتب و بعد إهني !:S

تم شرائها بعدما حاول أن يغريني بشراء غيرها ولكن جميع المعروض كانت لدي منه نسخة بمكتبتي

حتى باغتني بقوله: كلهم عندِك ، ليه جايه المعرض ؟ .. كيفي بأتمشى زين

;p

وترد عليه أخيتي : ما نشتري نسختين من كتاب واحد لأن آنا وياها واحد

ونسني ردها ، أحس إني تشققت ^_*

يوميات الصبر والمر لـ ليلى العثمان

مذكراتها أثناء فترة الغزو ، ما أتوب منها صح

..

الفرنسية للعرب لـ كورس عثمان - الدار الوطنية الجديدة

كتاب لتعلم اللغة الفرنسية ، كون أنجي تريد تعلمها و لي خبرة سابقة شبه ممسوحة

تم شراء نسختين حتى نبدأ الدراسة معاً

;)

قمة السعادة النفسية لـ الدكتور محمد صادق الموسوي

كتاب قديم ، أهديته لشخص ما لا يستحقه و أردت أن أسترجع نسختي القديمة

مفيد لمن ينشد صحة نفسية أفضل

في اليوم الثالث

كنت برفقة أخي الثاني - الوسطي- صديقي الحبيب

كان الهدف من هذه الرحلة هو الحصول على نسختي الموعودة من

مطبخ - خيالات ضوء القمر لـ بنانا يوشيموتو

من المجلس الوطني للثقافة والفنون و الآداب

ولكن للأسف لم يتم احضارها بعد

فباءت الرحلة بالفشل .. و الحَمَق

!

في اليوم الرابع

كان الهدف واضحاً وهو الحصول على رواية بنانا ، و كنت لوحدي

أكره الذهاب لأي مكان لوحدي .. احساس مزعج

أشعر بأنني تائه

و أخيراً حصلت عليها ولكن بعد موقف بايخ

..

عندما كنت برفقة أنجي سألت عن الرواية و كان الشخص المسؤول عن البحث متعاوناً جداً

بحث عنها فلم يجدها ضمن المعروض

اتفقنا على حضوري في اليوم التالي لإستلامها

كونها متوفرة بالمجلس

وعند حضوري في اليوم المحدد اعتذر لعدم توفرها

كون الفتاة المكلفة بإلإتيان بها من المجلس لم تستطع الحضور بالوقت المحدد

واليوم

بمجرد دخولي للركن المخصص للمجلس

لمحته يقف مبتسماً

سألني عن عدد النسخ المطلوبة

وحده ..

رأيته يضع في الكيس نسختين

تغاضيت عنه ، و سألته عن السعر

تفضلي أول ، مسكي الجيس

..

توكلي على الله اختي

ما يصير ، جم سعرهم

والله ما راح آخذ منج شي .. كافي عنّيناج مرتين

سامحينا على التقصير

آنا منصدمه ، ليش تحلف

ما يصير آخذهم جذيه

لا والله ما آخذ منج شي

يا ربي ليش تحلفون .. طوّلت السالفه ، حسيت شكلي غلط و آنا قاعده أترجاه يآخذ فلوسهم و أهو يقول ما آخذ

صرنا طماشه

!

بسرعه قلتها و طلعت بدون ما ألتفت

مشكور وما قصرت أخوي ، عساك عـ القوه

..

موقف محرج .. موشي كلش

.

.

.

.

طبعاً في كتب دوّرتها وما حصلتها

مثل

الموسوعة العلمية الميسرة ، كتاب قديم أحببت الحصول على نسخة منه لمساعدة آخر العنقود في دراسته و تعويده على فتح كتب

كتب لـ بزه الباطني ، وكأنها من كوكب آخر ! لا أثر لأي شيء يخصها

خواطر سيد قطب " أفراح الروح " ، كتاب نادر و صعب الحصول عليه .. عجزت ويأست الحصول على نسخه منه

موسم الهجرة إلى الشمال لـ الطيب صالح ، كنت متلهفة لقراءته على الرغم من توفر جميع اصدارات الكاتب إلا أن هذه الكتاب بالذات غير متوفر

***

هذا كان تقرير مفصل لرحلة الحصول على الكنز

و الآن حان دوركم

ماذا كانت حصيلتكم

؟

~*~ مع تمنياتي للجميع بقراءة ممتعة و مفيدة ~*~

 
posted by 78o8eYa at 9:08 PM | Permalink |


22 Comments:


  • At 11:27 AM, November 30, 2006, Blogger 7osen

    اولا احب احييج تحيه حاره
    واحب اشيد فيج

    على حبج للقرأه وحرصج على اقتناء الكتب

    ثانيا تحيه اخرى على تنوع قراءتج
    وهذا الشي يعطيج ميزه اضافيه

    *****

    استمتعت بقراءة البوست مالج

    والكتب اللى شريتيها وااايد مميزه
    وفيها تنوع حلو 0

    اتمنالج كل الاستمتاع بالقراءة
    ***

    حلو الموقف اللى صارلج

    والصرحه حركه حلوه اللى سووها معاج
    يشكرون عليها 0

    انا حصيلتي كانت كبيره واايد
    وامس الاربعاء كنت هناك

    منها
    الارجوحه ،، حمد الحمد
    فسوق ،،عبده خال
    احلام فترة النقاهه ،،نجيب محفوظ
    صمت الفرشات ،،ليلى العثمان
    آنا كارنينا ،،ليو تولستوي
    بكاء تحت المطر ،، قماشه العليان
    تذكرة سفر ،،علياء النصاري
    مئة عام من العزله ،، غابرييل غارسيا ماركيز
    الحب في زمن الكوليرا ،، ايضا غابرييل

    سعار ،، بثينه العيسى
    هذي بس الرويات
    اذا كتبت الباقي ما راح اخلص

     
  • At 11:42 AM, November 30, 2006, Anonymous khaled

    كـل يـوم اقـول ابي اروح والظاهر ماكو نصيـب اشغال ماخذتنـي حتي عن القـرأة بالكتب اللي عندي
    المهم انك استمتعتي بالتجول في معرض الكتاب وفـعلاً الدعاية لـ هذا المعرض للأسف قليلة ...
    لو حفلة نانسي عجرم او غيرة
    جان شفتي الدعاية توصلج حتي بالتلفون مسجات ..
    المهم انتي اخذتينا معاج بالجولة
    وانا شكلي الظاهر مايمدي اروحله

     
  • At 4:37 PM, November 30, 2006, Blogger kuwaitia

    صاجه والله الاعلان عنه كلش قليل وانا مادريت

    عنه الا من وحده اعرفها اصلا استغربت

    قلت شنو ماسمعنا ولا قرينا

    بش ماشالله انتى اسلوبج وايد حلو وقوى فى

    الكتابه كل هاذا من كثر قرائتج بالكتب

    احسنلج والله القراءه وايد مفيده انا مثلج

    احب القراءه وايد لكن الدنيا ومشاغلها

    خذت منى وقتى :))

    عليج بالعافيه على الكتب الي شاريتهم

    وانا حسافه مارحت المعرض

    :)))

     
  • At 8:59 PM, November 30, 2006, Blogger moklet-choka

    ونااااسة
    حدي استانست وأنا أقرا البوست

    بثينة العيسى
    قريت لها أول شي سعار
    حبيت حصيلتها اللغوية
    وتراكيبها و فلسفتها
    بس ما حبيت شخصية البطلة
    ولا القصة بحد ذاتها

    :/

    بعدين قريت لها عروس المطر
    مفرداتها مو طبيعية ما شاء الله
    و ما أدري ليش
    حسيت إني كنت حاطة فكرة غلط عنها
    :]


    :


    مطبخ
    قاريتها منزماااان
    نسيت تفاصيلها
    بس في كتب
    تبقى حية فيج
    تقولين عنها حلوة .. و ما تدرين وين الحلات فيها
    تقولين عنها عميقة و ما تدرين عمقها لأي درجة
    جذي مطبخ بالنسبة لي
    :)

    و بالعافية
    نسختين و ببلاش بعد
    ;p

    :

    :


    خلف أسوار العلم
    مممم .. ما أعتقد عندي إياه

    بس عندي مؤلفات ثانية لـ م.سند مثل
    هادم الأساطير
    و تحدث العلم
    و حدث في الكويت

    حلوين .. عالم ثاااني
    :)

    :


    أفراح الروح

    قريته قبل ممممممم .. يمكن
    خمس سنين
    أو أكثر
    استعرته من صديقة
    حلو .. حلو .. حلو

    إذا لقيتي له نسخة
    قولي لي من وين
    لأني أدوره و فعلاً أبيه
    :)

    :


    :

    حصيلتي

    خلطتها بمكتبتي
    منها

    3 كتب لغادة السمان
    أبي أكتشف الكاتبة

    الآن نفتح الصندوق
    لـ د.أحمد خالد توفيق
    و قوس قزح
    لـ د. أحمد خالد توفيق
    و
    د. تامر ابراهيم

    و ممممم

    نسيت شنو بعد
    :D

     
  • At 9:44 PM, November 30, 2006, Blogger Hosno

    حلو ذوقج في اختيار المواضيع كلها مختلفه
    وكتاب معروفين والموقف مو حلو لأنه يحطنا في موفق ضعيف جدام الغير ويخلينا نتراجع مبدأ ان كل شي بحسابه
    ما عندي حصيله للأسف من هالمعرض السنه اليايه راح اقولج حصيلتي انشالله
    موفجه انشالله حقوقيه
    :)

     
  • At 12:26 PM, December 01, 2006, Blogger 78o8eYa

    7osen

    خالص الشكر و عظيم الإمتنان لما كتبت
    وان كنت أظن أنه لا مزايا إضافية لي بإستثناء هذه القراءة- الميزة الوحيدة

    ------

    إن شاء الله دوم مستمتع
    :)
    وبالنسبة للموقف ، كان قمة الإحراج
    !
    طلعت منهم أدوّر الباب
    ..
    :$


    شكراً لوضع حصيلتك القيمة
    مع تمنياتي لك بقراءة ممتعة


    على فكره ، شـخبارك مع الأرجوحة ؟
    ^_^


    -=-=-=-

    khaled

    الله يعينك على مشاغلك ، ولو إن المعرض ما راح يآخذ من وقتك ساعه
    واليوم آخر يوم .. يعني ليما ألحين في فرصه
    :)

    وعلى ضعف الدعاية ، خلها على الله يا خوي



    -=-=-=-


    kuwaitia

    يا بعد جبدي يا كويتية
    كله رافعه من معنوياتي
    ;p

    " اللهم لا تؤاخذني بما يقولون،واغفر لي ما لا يعلمون، واجعلني خيرا مما يظنون"

    تمسكي بهالحب ولا تتخلين عنه بسهوله، مهما كانت مشاغلج
    حاولي تقرين ولو على فترات متباعدة

    الله يعافيج و يخليج لعيون تغليج
    ^_^


    -=-=-=-


    CHOKO

    إن شاء الله دوم مستانسه
    :)



    على فكره ، مطبخ آنا بايقتها منج
    ;Pp~
    شوقتيني أقراها .. أخلص من اللي بيدي و على طول بـبلش فيها
    :)

    الله يعافيج ;)


    خلف أسوار العلم ، وايد حلو
    حرصي تآخذين نسختج

    آنا كنت قاريه مذكرات مراهق كويتي الجزء الأول بس - الثاني ما قريته ليما ألحين
    لـ م. عبدالوهاب السيد

    وبما أن الكاتب أخو صديقة عزيزة شريت الموسوعة بناءاً على نصيحتها

    أول ما أحصل "أفراح الروح" نسختج هدية مني لج ^_*

    شكراً لوضع حصليتج اللي ناسيه نصها .. ولا عليج أمر نبي الباجي
    ;p

    موفقه يا الشوكو



    -=-=-=-

    Hosno

    الأحلى مرورك
    اي والله مو خوش الموقف ، مو ضعيف جدام الغير كثر ما أهو
    احراج
    !!
    طلعت منهم أحس الكل يطالع ويهي الأحمر
    ..
    :$

    إن شاء الله ، اذا الله أحيانا .. السنه اليايه نترقب حصيلتك
    ولك كل التوفيق حضرة الدنتست
    ^_*

     
  • At 1:06 PM, December 01, 2006, Blogger le2o

    7abaait ur post .. 9ij shay shadnii !! .. o eeh wallah 9ij il e3lan 3alaih eshwaya .. ana law mu il 9edfa chan ma daraait 3ana !! o 7ady abee arou7 again cuz a7esni kilsh ma sheft shay .. eftaraait eshway o khathaitli cham ketab o 6ala3t .. mashallah 4 days i hope that u had fun ehnak =) .. mumken so2al ?! .. shenu ur best book ele 9ij ten9e7een feeh sewa2 tawch shareta or min zeman !! 3ashan i will read it enshallah =D
    ashkerech o ya36ech il 3afya

     
  • At 1:21 PM, December 01, 2006, Anonymous ENG-Q8iya

    خوش محصلة ...

    آنا للأسف ما حصلت لي فرصة إني أروح مرة ثانية ولو إني أتحرق للذهاب ... عاد اليوم آخر يوم إنشالله يمديني و أروح
    مجموعتي إنتي تعرفينها ! كلها روايات و أغلبها بتوصية من مقامج الموقر :)

    أخيرا خلصت الأرجوحة و صارلي يومين الحين من خلصتها و آنا عايشة معاهم ...
    لازم أقاوم و افتح رواية ثانية عشان أطلع من معتقل الأرجوحة إليي صارلي يومين أحوم بين جدرانه وبس قاعدة أطلع حلول و تفاسير ... و قاعدة أصيغ النهاية بشكل ثاني ...

    أكره نفسي لما أندمج لي هالدرجة :|

    .............................

    أبييييييييييييييييييييييييييي النسخة الثانية مالت بنانا !

    والله لو آنا منج جان آخذ الجيس و أشكر الريال و أمشي ...

    الحين أهوه معنيج .. و كل يوم طاقة شلالة و رايحة عالفاضي ... و آخر شي يايب القصة متأخر عن موعده بسبب وحدة مادري واحد ما داوم أو متأخر ؟؟ سبب تافه .. والله لو آنا جان ماخذة الجيس و ماشية :) لول

    إييي أهو عطاج نسختين. وحدة لج و حدة لي عشان أول مرة رحناله كنت آنا معاج ... أهو يوم قلتيله المؤلفة بنانا و عطيتيه الويه الجد مالج كان مسكين مستحي ... بس آنا أعتذر إني كريكرة و ما أقدر أمنع نفسي من الضحك (شنووو بنانا؟ هاذي شنو تسمي بنتها بالله ؟)
    هذا كان ناطر الشارة شافني أضحك وجاااان يضحك أهوه :))
    مسكين جنه منسميين عليه لول

    :^)
    ENG-Q8iya

     
  • At 3:28 PM, December 01, 2006, Blogger Alather

    اليوم أخر يوم اليمعة..
    احس انني ما شبعت بس خلصت فلوسي :\

    استمتعت بقراءة ما شريتيه ..
    لنا عودة نقولج شنشريت بس يمكن لي بليل تلقينهم زادوا الكتب :))

    الموقف احم لا تحسدين عليه
    :))

     
  • At 3:56 PM, December 01, 2006, Blogger 7osen

    ميزة القراءه تكفي
    لأنها تجعل الانسان يتمتع بالعديد من المزايا

    انتي مادامج تحبين القراءه اكيد انتي انسانه مميزه
    :)

    رواية الارجوحه خلصتها صارلي يومين

    حلوه عموما
    لكن ما تبقى بالذاكره ،، فيها احداث جنها فلم مصري ابيض واسود

    خصوصا لما راحت مريم تاخذ الملف مالها من دار الرعايه

    ضحكت على الموقف اللى صار

    عجبني فيها في بدايتها لما قال شافي حق سعد

    عندما تفقد ياسعد القابليه للحب
    تسير الايام كسير السلحفاة بطيئه ثقيله
    وكان قدري انني ابحث عن الحب وعن الايام الجميله

    عموما حلوه
    انتي شرايج فيها

     
  • At 11:59 PM, December 01, 2006, Blogger kuwaitia

    وااااي حقوقيه والله احبج

    بعد عمرى مشكوره على دعوتج الحلوه

     
  • At 12:10 AM, December 02, 2006, Blogger Alather

    عدنا : )

    رحت اليوم وكان زحمة مو طبيعية
    المواقف زحمة..
    مادرت نطرت احد يطلع ادخل مكانه : ))

    اليوم الأول يوم الثلاثاء اول ما افتتح رحت له العصر : )
    وشرت أكثر شي بهاليوم

    الرجال من المريخ والنساء من الزهرة ..إهداء الى عزيز

    ديوان فايق عبدالجليل

    رواية
    موزاييك
    غيبوبة الجسد
    مدينة الرصاص
    الصقيع
    بارقة أمل
    ثمالة حب
    سينفونية ريما
    الرجل الحائط(قماشة العليان)
    الزوجة العذراء( قماشة العليان)
    ويبقى الأمل << كله اشوفها على رف مركز الطالب بكليتنا

    ويبقى الامل .. طلع عندي ثنتين مادري اشلون وصلوا عندي ..
    تعبت من التفكير تعقدت وانا افكر اشلون وصلوا عندي وماني قادرة اتذكر من اي مكتبة ..
    شسوي ؟؟ اردها ولا اخليها ؟؟
    بس خليتها واهديتها لرفيجتي :))


    ومجموعة رفيجتي شرتهم كسرت خاطرها
    عشان نتبادل
    إمراه مكهربه لثريا البقصمي
    أوراق فتاة حائره
    أنثي العنكبوت لقماشه العليان

    بعدين رحت
    مرتين
    وشريت

    قوس قزح

    والمرة الرابعة وهو اليوم الاخير :)
    حددت أكثر شنو أبي .. فحطيت أشياء بالمرتبة الأولى
    عيون قذرة
    ارتطام لم يسمع له دوي
    صمت الفراشات
    موسم الهجرة الى الشمال<< مايدرون عنها كلش
    فسوق
    مطبخ

    مالقيت ولا وحدة
    واللي المجلس الاعلى للثقافة والفنون ساعدني وقالي وين اقدر احصلها يعطيه العافية
    لانها خالصة

    فلما رحت صوب اصدارات حمد الحمد وليلى العثمان
    أخذت لي المؤلفات اللي كنت حاطتهم بالمرتبة الثانية .. من الحرة شريت مع اني مابيهم بالوقت الحالي :P



    الأرجوحة.. حمد الحمد

    خلف أسوار العلم . م عبدالوهاب
    شجعتيني أشتريها : )
    السيد و م. سند راشد دخيل

    وبما اني مالقيت صمت الفراشات مع اني رايحة عشانها فشريت

    غرفة السماء.. رواية ميس العثمان

    مساءات وردية .. حمد الحمد

    يوميات الصبر والمر .. للمؤلفة ليلى العثمان
    شجعتيني عليها :)


    سلوة العاشق .. شدني الكتاب لما شفت محتوياته مع إهداء من المؤلف عايض القحطاني :)
    شعور حلو

    قصص عالمية للأطفال بيضاء الثلج .. عشان أتذكر طفولتي ..كان عندنا من هالسلسلة القصصية جم قصة .. بغيت أخذ غيرها بس قلت كافي وحدة
    أمي قامت تضحك تقولي خشيها حق عيالج
    http://www.9q9q.org/index.php?image=APV40XJLHjih


    أول مرة اشتري هالكثر..
    لول
    ليت اكو اكثر من معرض بالسنة ..

     
  • At 5:11 AM, December 02, 2006, Blogger Cr8ivia

    واو .. نتقاسم التوهان بين الكتب :)

    رحت المعرض مرتين .. مره مع اختي .. و مره مع اختي الثانيه

    على فكره اليوم انا و خواتي كنا نتناقش عن شي في الحقوق طرت دكتوركم عبدالرسول بهبهاني عاد ههه خريجه حقوق بعد اهيه و الثاننيه طالبه عنده الان او توها مخلصه منه شي جذي
    يمدحونه


    المهم

    المعرض هممم ماعجبني السنه .. اليهال واق و ويق .. و وايد كتب مو موجوده .. و لويه وايد .. و لا جديد يذكر !!

    بس طبعا ما يمنع اني شريت

    روايه 100 عام من العزله لغابرييل ماركيز

    العصفوريه لغازي القصيبي

    بشروا و لا تنفروا لعبدالرحمن العشماوي

    حتى تكون أسعد الناس لعائض القرني

    زدني علما "خطوات على درب الفاعليه" لأحمد البراء الاميري

    أسعد إمرأه في العالم أهديت نسختي منه لصديقه من مده و الكتاب لازم يكون في كل مكتبه فشريت ثانيه!

    A+ Certification
    بما اني اقدم الاي بلس الان فشريته بالطريج

    و بس !!:|
    دورت رواية لتركي الحمد بس ما لقيتها و قالي اللي بالساقي في جرير .. مريت اليوم جرير و قالي خالصين كلهم ..

     
  • At 12:55 PM, December 02, 2006, Blogger Smile

    معرض الكتاب .. هل المره يوم رحت . كنت مستانسه لان الكتب اللي عن الجن والفنانين واغانيهم السخيفه اللي مسوين عن كتاب .. ما كان فيه .. والا عن التهلكه وكتب تخرع لناس وسخيفه ما لقيت

    واللي يضيق الخلق ان اكثر من كتاب دورته ما لقيته .. موت الغرب .. وانطباعات امريكي اعتنق اللاسلام .. الكتب كانت ممنوعه .. ايه ليش ؟؟!!!! هذه اللي ضيق خلقي


    بس ما يمنع انني ما اشتري .. شريت
    لتوفيق الحكيم .. كتابين
    الغريبه .. تكمله لقصة السجينه .. مليكه اوفقير
    خواطر شاب .. احمد الشقري
    مذكرات سمين سابق
    ابو شلاخ البرمائي .. غازي القصيبي

     
  • At 5:16 PM, December 02, 2006, Blogger AuThoress

    حقوقية :
    مساؤك طيّب ، اسعدني أن "أتعثّر" في فضائك الخاص ، وشكرا للصدف أننا التقينا وتناقشنا :) أهلا بـ التماعة عينيك اللتين ظلّتا بالذاكرة


    ودّ لك

     
  • At 5:38 PM, December 02, 2006, Blogger 78o8eYa

    le2o

    هلا والله :)

    الحمدالله إن بوستي ونسج ، بس ما قلتي لنا شنو شريتي من المعرض .. ؟

    بالنسبة للكتاب اللي أنصح فيه .. ما بينتي لي بأي مجال بالضبط ودج تقرين ، روايات
    مجموعة قصصية
    شعر
    تاريخ
    علم نفس
    سير ذاتية
    قصص عالمية

    ..
    حددي شنو بالضبط وما يصير خاطرج إلا طيب إن شاء الله ;)



    -=-=-=-=-

    ENG-Q8iya

    وأخيييييييراً خلصتي الأرجوحه بعد قراءة متقطعه دامت ... ماني قايله شكثر عشان ما يحسدونج
    ;pP~

    شي حلو إنها أثرت ووصلت صح
    ..


    أفاا عليج آنا قايله النسخة الثانية من بنانا حقج ، بس انتي مستعيله على رزقج
    :))

    ذكرتيني و آنا يعني جد و ما أبي أضحك وأقوله ، الكاتبة يابانية اسمها : ... بنانا ، بنانا يوشيموتو

    انتي ضحكتي جان أكملها معاج

    شوي أضحك و شوي أقلب جد ، بس بعدين خرناها
    :D~
    LOL


    -=-=-=-=-


    7osen

    مشكور على هالكلام ، وما قصرت على هالرفعه القويه
    والتميز هذا بعض مما عندكم
    :)

    مبروك على الإنتهاء من الأرجوحة

    أكون صريحه معاك
    آنا قاريتها من أكثر من سنه و نص

    ما أذكر الأحداث بالضبط و بالتفصيل بس اللي أعرفه و متأكده منه

    إن الرواية أكبر من اللي مكتوب بوايد

    حمد الحمد حاول يكتب قصة تسلط الضوء على فئة عايشه معانا بالمجتمع و احنا مو منتبهين لها ولا حاسين فيها

    هالفئة درست معانا بكل المراحل حالهم حال أي بنت أو ولد عاديين ، عايشين حياتهم بين عايله طبيعيه و حياتهم طبيعيه

    مع إنهم مو جذيه بالمره

    وفوق هذا الحكومة مو مقصره عليهم بشي، معطيتهم أسامي و جناسي و معاشات و زياده على هذا ترا لهم الأولوية في الديوان للتوظيف على جميع الشهادات و الخبرات

    انت متخيل إن في ناس تمثل إنها عايشه حياتها عادي و إهي مو جذيه

    يمكن يكونون معاك بالدوام أو تصادفهم بالسوق

    أو حتى تسافر معاهم بطياره وحده

    تشوفهم ما فيهم شي يفرق عنا بإستثناء الأصل
    ...

    أعرف وحده من زميلات الدراسه كانت تسولف لي عن بنات الرعايه
    بحكم إن أمها تشتغل هناك

    لما تشرح لي طريقة العيشه هناك ، و تعاملهم مع بعض و نظرتهم للمدرسات و المربيات على بو انهم أمهاتهم ، و ينادونهم بـ ماما فلانه

    وشلون عندهم بيوت صغيره يكونون حاطين فيها أكثر من صبي و بنت مع مربية أو مدرسة تباريهم

    عايشين مع بعض كـعايله وحده ، و يكبرون اليهال وأهم يظنون إنهم عايله وحده من صج

    ليما يوصلون لمرحلة يفرقون فيها بين البنات و الصبيان ، و يصارحونهم بحقيقتهم
    ...

    لما أفكر باحساسهم بهاللحظه و حرمانهم
    من العايله اللي كانو عايشين فيها
    و نظرتهم لنفسهم .. شي يعور القلب

    وما لهم ذنب باللي صار ،أهلهم اللي قطوهم ومشو ..

    غلطتهم أهلهم

    وعلى فكره مو الكل يكونون عيال غلطه ، في بعضهم أهلهم معروفين بس يكون الأبو غلط مع وحده أو متزوج زوجه ثانيه من جنسية ثانيه على زوجته الكويتية و ما يبي أحد يدري .. فـ يودي ولده أو بنته للرعاية

    طبعاً ما يوديهم بإيده و يسلمهم لكن يدري إنهم هناك و عايشين و لا عليهم قاصر بإستثناء هالأصل و معرفة أهلهم


    الرواية وااايد أثرت فيني و خلتني أعيد النظر بهالموضوع و أحمد ربي إني عايشه بين أم و أبو وأخوان

    عايشه حياتي طبيعيه أعرف منو أهلي و شنو أصلي

    الحمدالله
    ..

    أتمنى تعيد قراءة ما وراء السطور و تعيش مع الشخصيات أكثر

    ما أنكر إن الكاتب ميّز الرواية بعبارات و أمثال و مواقف يعتبر منها لكن يظل في أشياء وايد تكلم عنها بدون ما يصرح فيها

     
  • At 6:00 PM, December 02, 2006, Blogger 78o8eYa

    kuwaitia

    حبتج العافيه و الجنه الدافيه
    ^_^

    وآنا بعد أحبج
    :*


    -=-=-=-=-=-

    Alather

    أهلين يا الأثير
    :)

    دايماً يكون آخر يوم زحمه
    ..
    ما شاء الله حصيلتج غنيه جداً
    ولذيذه
    ;)

    الغالبية عندي منها نسخه و قاريتهم
    اختبارات موفقة و قراءات ممتعه

    شدي حليج و اقريهم كلهم عشان نسوي ملتقى ثقافي نستعرض فيه الروايات و الدروس المستفاده

    ^_*

    كل التوفيق يا الغالية


    -=-=-=-=-


    Cr8ivia

    حيا الله التوهان و أهله ;)

    اي والله خوووش دكتور ، وايد أحترمه و أعتبر بمثابة اليد خاصة إن حفيدته كانت تدرس معاي
    الله يخليه لأهله و يطوّل بعمره

    و ربي يخلي لج خواتج و يوفقهم
    ^_^

    اي المهم

    المعرض صح ما فيه وايد كتب يديده بس يظل له دور في الحصول على نسخ غير متوفرة بالمكتبات

    حصيلتج مميزة

    شاكره لج مشاركتنا فيها
    حياج ربي
    :)



    -=-=-=-=-

    Smile

    أول شي ، أرحب بزيارتج الأولى و أتمنى ما تكون الأخيرة
    :)

    عدل كلامج في كتب المفروض ما تنحط بالمعرض و الحمدالله ما لقيناهم هالسنه

    بس الكتب الممنوعة بصراحه ما عندي فكره عنهم ..

    شكراً على وضع حصيلتج ، و أتمنى لو تجاوبيني على سؤاليني لو سمحتي :

    ممكن تذكرين لي عناوين الكتابين لـ توفيق الحكيم ؟

    آنا قاريه السجينه بس توني أدري إن لها تكمله... الغريبة كاتبتها مليكة أوفقير و إلا أمها ؟

    وشكراً جزيلاً ^_^

     
  • At 6:15 PM, December 02, 2006, Blogger 78o8eYa

    AuThoress

    مساؤكِ سكر
    سعدت جدأً لمرورك بمدونتي التي تعطرت بطيب كلماتك

    لي الشرف بلقاءك وقراءة أفكارك

    مفاجأة أعجز عن التعبير بفرحي لحدوثها
    وأتمنى أن يستمر التواصل

    اعجابي و تقديري لك عزيزتي
    ^_^

     
  • At 6:41 PM, December 02, 2006, Blogger 7osen

    حقوقيه
    كلامج صحيح ان الكاتب سلط الضوء
    على قضيه مهمه بالمجتمع

    واهو بالحقيقه سلط الضوء على العديد من القضايا المهمه بالمجتمع
    وبشكل قريب جدا من الواقع وبأسماء تكاد تكون حقيقيه وهذا شيء يحسب للكاتب

    وكلامج عن هذي الفئه واايد مؤثر انا الصراحه كان عندي احسن جزء بالروايه اهو الرسائل اللى عطتهم البنت اللى بالدار حق مريم
    الرسائل كانت اروع شيء بالروايه
    فيهم كميه كبيره من الصدق والالم

    لكن اللى ما عجبني ان في الكثير من الاحداث اللى مالها داعي
    وفي احيانا الكاتب يمط بالروايه بدون سبب

    كان ممكن يختصرها كانت راح تكون وااايد اروع

    يعني في موقف ثاني رقم ان الاحداث في ذروتها لكن يثير الضحك بشكل كبير
    لما مريم راحت حق يدها اللى كان مريض بالمستشفى وكانت متلهفه انها تسمع باقي القصه منه
    يالها جورج اللى يشتغل عنده واهو حزيين وقالها مات يامريم مات
    اهي طبعا انصدمت وما عرفت شنو تقول
    قالتله منو اللى مات
    قال صديق الشنجعاني اللى بالغرفه الثانيه
    يعني هذا الموقف ما يضحك
    ما يذكرج بالافلام المصريه الابيض والاسود


    عموما الروايه موضوعها جدا رائع
    والاسلول حلوو بعد
    لكني اعتقد انها ممطوطه شوي لوكانت اقصر من جذي راح تكون واايد احلى

     
  • At 6:52 PM, December 02, 2006, Blogger 78o8eYa

    آنا قلت لك إني قاريه الرواية من مده طويلة فـ مو ذاكره التفاصيل بالضبط
    ..
    :S

    ويمكن أهو مط بالأحداث كـ عامل تشويق
    أو لأي سبب ثاني ، يبقى الكاتب له هدف معين

    وممكن لو إنه مثل ما تقول قصر بالأحداث و قلل من بعض الفقرات اللي ما كان لها داعي ، مجرد حشو .. يمكن كانت راح تطلع أحلى

    على العموم
    لولا اختلاف الأذواق لبارت السلع
    ومو شرط إني قريتها و عجبتني تعجب غيري


    سعدت بهالنقاش
    وبهالتواصل السريع

    شكراً :)

     
  • At 11:18 PM, December 02, 2006, Blogger Alather

    حقوقية
    قريت ردج عرفت عن شنو تتكلم الارجوحة
    :(

    اشوى ما كملت رد حسين وردج عليه جان اختربت متعة القراءة :p

     
  • At 5:05 PM, December 03, 2006, Blogger 78o8eYa

    Alather

    إهي تتكلم عن واايد أشياء
    بس هالموضوع أهو الأبرز

    اي لا تقرين الردود عشان ما نفقد الرواية بريقها

    وناطرينج لما تخلصينها تقولين لنا رآيج
    ^_*