لكل إنسان طاقه .. و بعدها يفقد القدره على العطاء
مزعج إنك تحس بضياع جهدك
بين حالة اللامبالاة المنتشرة
الإهمال ، اللي صار أمر عادي
اللي يكرف ، يكرفونه
لين تطلع عيونه
كلمه وااايد على لساني الأيام اللي فاتت
أحب شغلي و استمتع بمساعدة غيري
عندي الدوام شي مقدس
ولازم أحلل معاشي
مو نوعي آخذ إجازات
وحتى المرضيات نادره
مخليتهم للطواريء
بس وصلت حدي
وملييييت
أفكر آخذ إجازه بس لما أشوف الشغل اللي مو راضي يخلص أتراجع
كنت موقعه إجازتي حق العشر الأواخر ومو منزلتها حق الشؤون الإدارية
خاشتها عندي بالدرج
بلحظة غضب
ما أدري شلون نزلتها و نسيتها
قبل رمضان باسبوع ، أدوّرها
تذكرني زميلتي بالمكتب إني منزلتها من زمان
ضحكت على نفسي ..و أخيراً تجرأت وراح أطلع بإجازة
الاسبوع الأخير كان متعب
جنهم يقولون لي ، دام طالعه بإجازة
خل نكرفج
غير شغلي الأساسي وهو كتابة آراء قانونية و مراجعة عقود
بالإضافة إلى استقبال مراجعين محتاجين استشارات قانونية
أشتغل بمديونيات
خاصة بوزارة الطاقة
يبيلها طولة بال و دقة
السالفة فيها أرقام ، و آنا ما أحب الأرقام
بس مع الوقت تعودت عليهم و صارو ربعي
هذا كله بصوب
و المراجعين الحلوين اللي يراجعونا بصوب ثاني
العاده الناس تتحلطم من الموظفين برمضان
بس الوضع عندنا العكس
ماشاء الله مراجعين سنعين
ما أبي أحسدهم
مستشعرين الشهر الفضيل
و ما يجرحون صيامهم
ولا صيام غيرهم
ما أقول إلا الله يعينا
و يآجرنا
اليوم المفروض آخر يوم دوام
ما قدرت أقوم من الفراش من التعب
إصابة قديمة --يديدة بظهري
قعدتني بالفراش لي نص اليوم
خذيته يوم عرضي
كان آخر عرضي عندي
طبعاً البيت كله يسأل
ليش حقوقية ما راحت الدوام اليوم
؟
مو مصدقين إني مآخذه إجازه
الوالد يقولي
زين سويتي .. تريحين شوي
و الوالده مستانسه
ما بغيتي تطلعين إجازه ، عاد ألحين ما عندج عذر
بتدخلين المطبخ
وراح تطلعين معاي
هالإجازة بتكون حقي
أرتاح فيها من لوية الشغل
الضغط النفسي
و الأرق
هالإجازة بتكون حق ربي
أخلص ختمتي
أحاول أحفظ جزء
وأجيم الليل
الله يتقبل منا
و يعينا على ذكره و شكره و حسن عبادته
الأسطر المكتوبة أعلاه ، كتبت في لحظة بوح
محاولة فضفضة لا أكثر و لا أقل
قد تتبعها محاولات أخرى
~~~~~~~
أشكر اختي العزيزة
Alatheer
لسماحها لي بإستعارة هالـ
TaG
اللي سميته
من تكون في هذا الكون
^_^
على بركة الله نبدأ
اذا مستانسه: ابتسامة شقاقيه على الويه طول الوقت
اذا نفسيتي تعبانه: على قولة أمي "تنعقد النّونه" وأحن أبي أسافر
اذا قامته شي بقلبي و ساكته: ما أقدر أسكت و أقمت بقلبي، لازم أتشكى عند أحد
اذا صمت: هادية، أحياناً استيعابي بطيء و آخر عشر دقايق مسنحه و ضغطي نازل
اذا اندقرت: أكون جذي >> :/
اذا حسيت بضغط: أتحمل لي درجة معينة و بعدها أنفجر ! والإنفجار يختلف ما بين تحلطم أو اعلان حالة الطواريء أو بجي
اذا بحس بحرية: أروح هالأماكن بدون ما أقول حق أحد إني رحت ، المركز العلمي - بحر المارينا
:)) اذا أحد بط جبدي: أتحلطم
:) اذا عصبت: ما أشوف اللي جدامي - وهذي نادره بالفتره الأخيره واااايد ماسكه أعصابي ومو متهوره
اذا بنحاش من أمر ما: أتمشى بسيارتي بدون ما أعلم أحد وين رايحه - ووين ما توديني وياها
أو أعفس داري و أقعد أسنّع
اذا متضايقه من مكان: أطلع منه على طول وما أرد له مره ثانيه
اذا مفلسه: أسحب من حساب التوفير وبعدين يأنبني ضميري و أوعد نفسي إني ما أعيدها مره ثانيه
:) اذا أمي دقت تليفون: ما أرد على طول .. لأن رنتها حلوه -موسيقى سامرية البوشيه
;)اذا أبوي دق علي: بسرعه أرد لأنه ما يتصل إلا و يبي مني شي ضروري ، رنة الوالد -الجسمي حاجه غير
اذا بجذب: عيوني تفضحني
اذا توهقت : ويهي يصير ؟ - الحلج مبطل طبعاً
اذا استحيت: يقلب ويهي أحمررر و ما أعرف أتكلم، و أطلع من المكان اللي قاعده فيه
اذا انظلمت: أحاول أدافع عن نفسي بكل الطرق و بعدها أدعي .. حسبي الله ونعم الوكل هو نعم المولى و نعم النصير ، و يمكن أبجي
اذا أحد تقدم لي: مهم أعرف رآي أبوي ، قبل كنت أتوتر و أفكر بالموضوع وايد بس ألحين ما أهتم و يبقى معرفة رآي أبوي شي مهم
ليلة العيد: أزهب كل الكشخه و أحاول أنام مبجر لأن وراي فزعه من الصبح
اذا حسيت إن أحد متضايق مني: أراضيه و أتسامح منه أو بشكل غير مباشر أتنقص له شي يذكره فيني و أكتب معاه كرت باللي أبي أقوله ، و يعتمد على علاقتي مع هالشخص
اذا ضايقتني أمي: أنعزل بداري أو بالسرداب
اذا ضايقني أبوي: أحسسه إني متضايقه بكلامي أو بنظراتي
اذا صادفتني بالغة شف: أجاوبها على المزاج و أطنش اللي ما أبي أقوله ، و على ضحك أقولها .. يعني بتموتين اذا ما عرفتي ؟ :P~
تم بحمد الله
ما أدري ليش بس المسافات ما تطلع بالشكل النهائي للموضوع
صار كلامي كله على بعضه
أحس صاير لويه
الله يعينكم ياللي بتقرون هالقرقه
:))